Տերսիմի Հայերու Կոտորածներուն Մասին Վաւերագրական Ֆիլմ Նկարահանուած Է Թուրքիոյ Մէջ

nezahan gundogan

Թուրքիոյ մէջ  վաւերագրական ֆիլմ նկարահանուած է` Տերսիմի Վանք գիւղի հայերու` 1937-38 թուականներու կոտորածներուն մասին: Ըստ ermenihaber.am –ի՝ «Özgur Gündem» թերթի կայքը կը տեղեկացնէ` վաւերագրական ֆիլմը կը կոչուի «Վանքի երեխաները» եւ կը պատմէ Վանք գիւղի, հոն բնակող հայերու ու անոնց դաժան ճակատագրին, տեղի պատմական հայկական վանական  համալիրին մասին, որ ռմբակոծուած եւ աւերուած է 1938-ին: Ֆիլմին բեմադրիչը  Նեզահաթ Կիւնտողանն է: ֆիլմին մէջ ներկայացուած է նաեւ երեք տարբեր ազգերու եւ տարբեր կրօններու պատկանող երեք եղբայրներու պատմութիւնը: Եղբայրներէն ամէն մէկը ճակատագրի բերումով ապրած է  տարբեր ինքնութիւններով` որպէս հայ, թուրք եւ քիւրտ: Անոնցմէ  մէկը քրիստոնեայ է, միւսը` իսլամ, երրորդը` ալեւի: Այս պատմութիւնը կը ցուցադրէ  Տերսիմի կոտորածներուն ողջ դառնութիւնը:

Լրագրողներու հետ զրոյցի ընթացքին ֆիլմին ռեժիսորը նշած է, որ Վանք գիւղը ու դարեդար հոն բնակած հայերու պատմութիւնները բացայայտած է պատահաբար, երբ «Տերսիմի կորսուած աղջիկները» ծրագրի ծիրէն ներս կ՛որոնէր տերսիմցի կորսուած հայ աղջկայ մը ազգականները:

Կիւնտողան ընդգծած է, որ հայերը եղած են Տերսիմի դարաւոր բնակիչները, սակայն այսօր այդ բնակավայրին մէջ հայեր գրեթէ չկան: Բոլորը հեռացած են, բնակութիւն հաստատած Թուրքիոյ կամ աշխարհի տարբեր ծայրերու մէջ:

Ըստ բեմադրիչին`  «Վանքի երեխաները» ֆիլմի նպատակն է  ցոյց տալ 1938-ին տեղի ունեցած  դժբախտութիւնները,  թրքական պետութեան վարած մարդասպան եւ ձուլման քաղաքականութիւնը, ինչպէս նաեւ պետութեան ու հանրութեան ստիպել առերեսուելու անցեալի հետ:

Վաւերագրական ֆիլմի ցուցադրութիւնը նախատեսուած է  2016 թուականին:

  • Facebook
  • Twitter
  • Delicious
  • LinkedIn
  • StumbleUpon
  • Add to favorites
  • Email
  • RSS