Արցախին Նուիրուած Երգահանդէս Յունաստանի Մէջ
Շաբաթ, 11 Նոյեմբեր 2023-ին, Նէա Զմիռնիի Լէոնտիօ վարժարանային համալիրի թատերասրահին մէջ տեղի ունեցաւ իւրայատուկ երգահանդէս մը, նուիրուած Արցախի ժողովուրդին, որ թուրքեւատրպէյճանական յարձակողականութեան ու ցեղասպանական քաղաքականութեան հետեւանքով ստիպուեցաւ լքել իր բազմադարեայ հողերը եւ դառնալ գաղթական։
Յունաստանի Հ.Կ.Խաչի Շրջ. վարչութիւնը եւ «Արմենիքա» պարբերաթերթի խմբագրութիւնը իրենց ուժերը միացնելով վսեմ նպատակին համար, միասնաբար կազմակերպեցին հայկական եւ յունական երաժշտական երանգներով լեցուն համերգ մը, որուն հասոյթը ամբողջութեամբ տրամադրուեցաւ Հ.Օ.Մ.-ի կողմէ հաստատուած՝ Արցախի գաղթականներու օժանդակութեան ծրագիրին։
Համերգին ներկայ եղան Յունահայոց Առաջնորդ Գեղամ արք. Խաչերեան, Ազգային վարչութեան ատենապետ պ. Թագւոր Յովակիմեան, Հ.Յ.Դ. Յունաստանի Կեդր. կոմիտէի ներկայացուցիչ ընկ. Հռիփսիմէ Յարութիւնեան, ինչպէս նաեւ միութենական ներկայացուցիչներ։ Ելոյթը իր ներկայութեամբ պատուեց նաեւ Նէա Զմիռնիի նորընտիր քաղաքապետ Եորղոս Քութելաքիս, որ ջերմօրէն գնահատեց համերգի նպատակը:
«Արմենիքա» պարբերաթերթի անունով, բացումը կատարուեցաւ տ. Արտա Ճէլալեանին կողմէ, որ անդրադարձաւ ելոյթի նպատակին եւ սրտագին շնորհակալութիւն յայտնեց հայ եւ յոյն ծանօթ արուեստագէտներուն, որոնք սիրայօժար ընդունեցին իրենց մասնակցութիւնը համերգին եւ օգնութեան ծրագիրին։
Հ.Կ.Խաչի Շրջ. վարչութեան խօսքը ներկայացուց ընկ. Նորա Քիւրտօղլեան։ Ան հակիրճ ներկայացուց Արցախի շուրջ ստեղծուած իրավիճակը, որ յանգեցաւ հայափաթումին։ Յաջորդաբար, նշեց Հ.Օ.Մ.-ի կարեւոր ծրագիրը՝ օգնութեան ձեռք երկարելու Արցախի հայութեան, ամոքելու համար ստեղծուած ցաւն ու ողբերգութիւնը։
Գեղարուեստական բաժինը ճոխ յայտագիր մը պարունակող բովանդակութեամբ, ընդգրկեց հայկական աւանդական եւ աշուղական երգեր, իսկ նաեւ ներկայացուեցան յունական ծանօթ երգեր, որոնք ջերմ ընդունելութիւն գտած են հասարակութեան մօտ։
Մէկ առ մէկ եւ հաւաքաբար, բեմին վրայ երեւցան արուեստագէտներ Վարդան Աբովեան, Ֆոթիս Վերղուլուփուլոս, Հայկ Եազըճեան, Փանտելիս Թալասինոս, Վահան Գալստեան, Շուշան Քերովբեան, Միհրան Չալըքեան, Լեւթերիս Խավուծաս եւ Սթամաթիս Խածիեւսթաթիու։ Բոլոր երգիրչներն ու նուագողները բացառիկ զգայնութեամբ ներկայացուցին հայկական եւ յունական երգարուեստի նմուշներ, շարունակական ծափահարութիւններ խլելով ներկաներուն կողմէ։
Կ՚արժէ նշել, թէ յատկապէս հայկական երգացանկը, բաւական հարուստ երգերով ճոխացած, հայրենի աշխարհի եւ հայկական գանձերու յատկանշական ծաղկաքաղն մըն էր, մերթ իր մեղմանոյշ ելեւէջներով, մերթ կշռութաւոր ընթացքով, որ ժողովուրդը պահեց խանդավառ մթնոլորտի մէջ։
Արուեստագէտները ելոյթ ունենանալով բեմին վրայ, երկու խօսքով դատապարտեցին Արցախի վրայ կատարուած յարձակողականութեան քաղաքականութիւնը եւ իրենց զօրակցութիւնը յայտնեցին ամբողջ հայ ժողովուրդին ու իր աննկուն պայքարին։
Համերգը առիթ մը եղաւ նաեւ քով-քովի բերելու երկու ժողովուրդներու երաժշտական մշակոյթը, ներկայացնելով հարազատ երգեր, որոնք միշտ մարդոց սիրտին կը խօսին։
Կը մնայ շնորհաւորել կազմակերպիչները, որոնք ճիգ չխնայեցին հրամցնելու համար լաւ պատրաստուած ելոյթ մը ու վերանորոգելու Արցախի հայութեան՝ ամէն գնով զօրավիգ կանգնելու հրամայականը։
ՆԵՐԿԱՅ ՄԸ
«ԱԶԱՏ ՕՐ»