ԱՄՆ ՄԶԳ-ն Կը Ծրագրէ Հայաստանին 32 Միլիոն Տոլարի Նիւթական Աջակցութիւն Տրամադրել

mzg

ՀՀ վարչապետ Տիգրան Սարգսեան ընդունած է Հայաստանի մէջ ԱՄՆ արտակարգ եւ լիազօր դեսպան Ճոն Հեֆըրնը եւ ԱՄՆ միջազգային զարգացման գործակալութեան հայաստանեան գրասենեակի ղեկավար Քարէն Հիլիարտը: Այս մասին կը հաղորդէ ՀՀ կառավարութեան տեղեկատւութեան եւ հասարակայնութեան հետ կապերու վարչութիւնը:

Զրուցակիցները գոհունակութիւն յայտնած են երկկողմ համագործակցութեան ընթացքէն, որմէ ետք վարչապետին ներկայացուած է ԱՄՆ ՄԶԳ-ի կողմէ մշակուող Հայաստանի զարգացման օժանդակելու հնգամեայ ռազմավարութիւնը եւ անոր ներքոյ իրականացուելիք ծրագիրներն ու գործողութիւնները: Ճոն Հեֆըրն նշած է, որ այսպիսով Հայաստանը եւ ԱՄՆ-ն պիտի թեւակոխեն համագործակցութեան նոր փուլ:

Քարէն Հիլիարտ տեղեկացուցած է, որ ԱՄՆ կառավարութիւնը կը փափաքի Հայաստանի կառավարութեան հետ կնքել ժողովրդավարութեան եւ կառավարման ոլորտի ծրագիրներու աջակցութեան նոր համաձայնագիր, որ իր տեսակին մէջ բացառիկ պիտի ըլլայ Եւրոպայի եւ Եւրասիայի տարածաշրջանին մէջ: ԱՄՆ ՄԶԳ հայաստանեան գրասենեակի ղեկավարը նշած է, որ Հայաստանի ժողովրդավարութեան եւ կառավարման ոլորտին մէջ նախատեսուող օժանդակութեան նպատակն է խթանել աւելի մասնակցային, արդիւնաւէտ եւ հաշուետւողական կառա¬վարման համակարգի ձեւաւորման, օտարերկրեայ ներդրումներու աւելացման, քաղաքացիական հասարակութեան զարգացման ու ամրապնդման, կաշառակերութեան դէմ պայքարին:

Նախատեսուող համաձայնագիրին ծիրէն ներս ԱՄՆ ՄԶԳ-ն կը ծրագրէ յառաջիկայ հինգ տարիներուն ընթացքին ժողովրդավարութեան եւ կառավարման բարեփոխումներուն աջակցելու նպատակով Հայաստանին տրա¬մադրել 32 միլիոն ԱՄՆ տոլարի նիւթական աջակցութիւն:

«Ասիկա մեր երկու երկիրներու կառավարութիւններուն միջեւ համագործակցութեան նոր մակարդակ է, որ կրնայ նախադէպ դառնալ տարածաշրջանի երկիրներուն համար, քանի որ որեւէ այլ երկրի հետ դեռ նման ծրագիր չենք իրականացներ»,- ըսած է Քարէն Հիլիարտ:

Վարչապետ Տիգրան Սարգսեան ողջունած է ԱՄՆ ՄԶԳ նոր ծրագիրը եւ նշած, որ մեր երկիրը պատրաստ է երկկողմ համագործակցութեան յետագայ ընդլայնման ու խորացման:

Համաձայնագիրը կը նախատեսուի ստորագրել մինչեւ Մարտ 31:

  • Facebook
  • Twitter
  • Delicious
  • LinkedIn
  • StumbleUpon
  • Add to favorites
  • Email
  • RSS