Սերժ Սարգսեանի Գրասենեակէն Առաջարկած են Իբրեւ Առանձնատուն Դիտարկել ԱԱԾ Ընդունելութիւններու Տունը

141121

ՀՀ վարչապետի պաշտօնին Նիկոլ Փաշինեանի առաջին յանձնարարականը նախկին նախագահ եւ վարչապետ Սերժ Սարգսեանի՝ օրէնքով նախատեսուած բնակարանով ապահովման հարցն էր։ Վարչապետը իր աշխատակազմի ղեկավարին յանձնարարած էր մէկամսեայ ժամկէտի ընթացքին լուծել խնդիրը, սակայն մինչ այս պահը Սերժ Սարգսեան կը բնակի Կոնդի առանձնատուներէն մէկուն մէջ։

Վարչապետի աշխատակազմի ղեկավար Էդուարդ Աղաջանեան «Հետք»-ի հետ զրոյցին ընթացքին կը վստահեցնէ՝ յանձնարարականի կատարման ուշացումը ունի իր պատճառները։

«Ի սկզբանէ որոշում կար, որ պէտք է տրամադրուի պետական գոյքին պատկանող որեւէ տարածք, որ պիտի ըլլայ համադրելի նախորդ երկու նախագահներուն տրամադրուած տարածքներու չափորոշիչներուն հետ, սակայն տարբեր փնտռտուքներու իբրեւ արդիւնք՝ մենք չգտանք նման պետական գոյք»,- կ՝ըսէ Աղաջանեան։

Էդուարդ Աղաջանեանի խօսքով՝ Սերժ Սարգսեանի գրասենեակէն առաջարկած են իբրեւ առանձնատուն՝ ԱԱԾ ընդունելութիւններու տունը դիտարկել, սակայն Կառավարութիւնը մերժած է։

«Ատիկա մեզի համար ընդունելի տարբերակ չէր, քանի որ պետութեան օգտագործման ենթակայ կառոյց է, եւ այնպէս չէ, որ այդ տարածքը չ՝օգտագործուիր եւ կարելի է նուիրել նախկին նախագահին: Անիկա յստակ նշանակութիւն ունեցող տարածք է, որ պարբերաբար կ՝օգտագործուի շատ կարեւոր իրադարձութիւններու համար»,- կը նշէ Էդուարդ Աղաջանեան։

Վարչապետի աշխատակազմի ղեկավարին խօսքով՝ քանի որ պետական այնպիսի գոյք չեն կրցած գտնել, որուն չափորոշիչները համարժէք ըլլան առաջին եւ երկրորդ նախագահներուն տրամադրուած տարածքներուն հետ, որոշում կայացուած է՝ մասնաւոր անհատէ մը գնել նման տարածք մը եւ տրամադրել Սերժ Սարգսեանին։

«ԱԱԾ ընդունելութիւններու տան տարածքին առանձնատան մը տարբերակը առաջարկուած էր, սակայն երրորդ նախագահի գրասենեակէն ստացանք պատասխան, որ այդ տարածքը անընդունելի է իրենց համար՝ հաշուի առնելով այդ պայմաններուն մէջ նախկին նախագահին անվտանգութեան ապահովման անհնարինութիւնը»,- կ՝ըսէ Աղաջանեան։

Ըստ Աղաջանեանի՝ անվտանգութեան աշխատակիցներէն խնդրած է, որ իրեն տրամադրեն անվտանգութեան ապահովման անհրաժեշտ չափորոշիչներու ցանկ, որպէսզի անոնց հիման վրայ Կառավարութեան աշխատակազմէն հարցումներ ուղարկեն անշարժ գոյքի գործակալութիւններ՝ հնարաւորինս սեղմ ժամկէտներու մէջ համապատասխան գոյք գտնելու համար։

  • Facebook
  • Twitter
  • Delicious
  • LinkedIn
  • StumbleUpon
  • Add to favorites
  • Email
  • RSS