ՀՀ Որոշ Զօրամասերու Հրամանատարներ Իւրացուցած են Մեծ Քանակով Վառելանիւթ, Շարժիչներ, Անուադողեր. ԱԱԾ Նոր Բացայայտումները

ԱԱԾ

Հայաստանի Հանրապետութեան Ազգային անվտանգութեան ծառայութեան ռազմական հակահետախուզութեան գլխաւոր վարչութեան աշխատակիցներուն կողմէ իրականացուած անմիջական-հետախուզական քայլերուն իբրեւ արդիւնք՝ 2018 Յունիս 11-ին եւ 12-ին, ՀՀ զինուած ուժերու առանձին զօրամասերու մէջ բացայայտուած են պաշտօնի օգտագործումով առանձնապէս խոշոր չափերով իւրացումներու դէպքեր:

ՀՀ ԱԱԾ մամուլի կեդրոնէն փոխանցուած տեղեկութիւններով՝ պարզուած է, որ 2017 Դեկտեմբերէն մինչեւ 2018 Յունիս, N զօրամասի քանի մը ստորաբաժանումներու հրամանատարներ իւրացուցած են մեծ քանակով վառելանիւթ:

Ձեռնարկուած քայլերուն իբրեւ արդիւնք՝ պարզուած է, որ զօրամասի վառելիքաքսուքային նիւթերու ծառայութեան պետը՝ համաձայնութեան գալով զօրամասի ղեկավարութեան հետ՝ կատարած է օրէնքին հակասող գործողութիւններ:

Մասնաւորապէս՝ վառելիքը մաս-մաս դուրս բերած է զօրամասէն եւ վաճառած տարածաշրջանին մէջ գործող լցակայեաններու սեփականատէրերուն: Այնուհետ, վաճառքէն գոյացած գումարին մեծ մասը փոխանցուած է զօրամասի հրամանատարին, իսկ մնացեալը՝ բաշխուած է ստորաբաժանումներու հրամանատարներուն միջեւ:

Ազգային անվտանգութեան ծառայութիւնը՝ ստացուած անմիջական տուեալներուն հիման վրայ՝ վառելանիւթի հերթական խմբաքանակի վաճառքի պահուն բերման ենթարկած է լցակայեաններէն մէկուն սեփականատէրը ու զօրամասի վառելիքաքսուքային նիւթերու ծառայութեան պետը:

Փաստին առիթով ՀՀ ԱԱԾ քննչական վարչութեան մօտ յարուցուած է քրէական գործ՝ ՀՀ քրէական օրէնսգրքի 179-րդ յօդուածի 3-րդ մասի 1-ին կէտի յատկանիշներով, այն է՝ առանձնապէս խոշոր չափերով իւրացումը:

Զինծառայողներու կողմէ եղած այլ անօրինական գործողութիւններու դէպքով, փաստական տուեալներ ձեռք բերուած են առ այն, որ 2018 Յունուար-Յունիս ամիսներուն, ՊՆ N զօրամասի նիւթական ապահովման համար պատասխանատու զինծառայողները, թոյլ տալով պաշտօնի չարաշահում ՝ նորոգման համար զօրամաս ուղարկուած ՀՀ զինուած ուժերու տարբեր ստորաբաժանումներու ինքնաշարժներու ճարտարագիտական պահեստամասերը, ներառեալ՝ շարժիչներ, փոխանցման տուփեր, անուադողեր եւ ընթացամասեր, նախապէս մշակուած յանցաւոր ծրագիրի միջոցով, ներկայացուցած են իբրեւ յետագայ շահագործման համար ոչ պիտանի եւ վաճառած ինքնաշարժի պահեստամասերու առք ու վաճառքով տարբեր անձերու, իսկ ստացուած գումարները իւրացուցած:

Նոյն պաշտօնատար անձերը, թոյլ տալով ծառայութեան շահերուն հակասող գործողութիւններ, առանձին ռազմական սարքերու վերանորոգման համար դուրս բերուած նոր պահեստամասերը վաճառած են եւ անոնց փոխարէն սարքերուն վրայ տեղադրած են օգտագործուած պահեստամասեր:

Ձեռք բերուած բաւարար ապացոյցներու համակցութեամբ՝ դէպքին առիթով ՀՀ ԱԱԾ քննչական վարչութեան մօտ յարուցուած է քրէական գործ՝ ՀՀ քրէական օրէնսգրքի 179-րդ յօդուածի 2-րդ մասի 1-ին, 2-րդ եւ 3-րդ կէտերու յատկանիշներով: Այն է՝ պաշտօնէական դիրքը օգտագործելով, խումբ մը անձերու կողմէ նախնական համաձայնութեամբ, խոշոր չափերով իւրացումը:

Նշուած երկու քրէական գործերով կը կատարուի նախաքննութիւն: Միջոցներ կը ձեռնարկուին յիշեալ դէպքերուն հանգամանքները եւ անոնց առնչութիւն ունեցող այլ անձեր պարզելու, ինչպէս նաեւ պատճառուած նիւթական վնասին չափերը ճշգրտելու ուղղութեամբ:

Հարկ է յատուկ շեշտել, որ զինծառայողներու կողմէ կատարուած նման գործողութիւնները զգալի նիւթական վնաս կը հասցնէ ՀՀ Պաշտպանութեան նախարարութեան: Ինչպէս նաեւ բացասաբար կ՝անդրադառնայ ՀՀ սահմաններու անվտանգութեան ապահովման գործընթացին եւ զինուած ուժերու մարտունակութեան, մարտական պատրաստակամութեան վրայ՝ նախադրեալներ ստեղծելով արտակարգ պատահարներու համար:

ՀՀ ազգային անվտանգութեան ծառայութիւնը կը յորդորէ հանրութեան՝ զերծ մնալ զինծառայողներու հետ հնարաւոր անօրինական գործարքներ իրականացնելէ: Իսկ ՀՀ զինուած ուժերու ներկայացուցիչներուն՝ կոչ կ՝ընէ զերծ մնալու հակաօրինական գործողութիւններէ, հակառակ պարագային անոնք պիտի պատժուին օրէնքի ողջ խստութեամբ:

Ծանուցում. ենթադրեալ յանցանքի համար կասկածուողը կամ մեղադրուողը կը համարուի անմեղ, քանի դեռ անոր մեղաւորութիւնը ապացուցուած չէ ՀՀ քրէական դատավարութեան օրէնսգիրքով սահմանուած կարգով՝ դատարանի օրինական ուժի մէջ մտած դատավճիռով:

  • Facebook
  • Twitter
  • Delicious
  • LinkedIn
  • StumbleUpon
  • Add to favorites
  • Email
  • RSS