Սէյրան Օհանեան Հարցաքննուած է Բանակին Մէջ Տեղի Ունեցած Չարաշահումներուն Գործով

RA Defense Minister Seyran Ohanyan answers question of journalists

ՀՀ պաշտպանութեան նախկին նախարար Սէյրան Օհանեան, երկու օր առաջ, իբրեւ վկայ հարցաքննուած է իր ղեկավարման տարիներուն բանակին մէջ տեղի ունեցած չարաշահումներուն գործով։ Այս մասին, ըստ  Azatutyun.am-ի, փոխանցած է Օհանեանը:

Պատասխանելով այն հարցին, թէ ինչի՞ շուրջ էր հարցաքննութիւնը, պաշտպանութեան նախկին նախարարը պատասխանած է,- «Նախաքննական ընթացակարգերէն մեկնելով՝ այդ հարցին ես չեմ կրնար պատասխանել: Անիկա կ՝առնչուէր բանակի գործունէութեան»:

Պետական եկամուտներու կոմիտէն մէկ շաբաթ առաջ յայտարարած էր, որ 2014-2017-ի ընթացքին Պաշտպանութեան նախարարութեան մէջ գնումներու եւ բանակաշինութեան ոլորտներուն մէջ առկայ չարաշահումներուն վերաբերեալ քրէական գործով մեղադրանք առաջադրուած է բարձրաստիճան երկու զինուորականի, անոնք չեն կալանաւորուած:

Յայտարարութեան մէջ նաեւ կը նշուէր, որ բանակին մէջ չարաշահումներու այդ գործով հարցաքննութեան կանչուած են ՊՆ նախկին ու ներկայ բարձրաստիճան պաշտօնեաներ, նաեւ այդ տարիներուն պաշտպանութեան նախարարութիւնը ղեկավարած Սէյրան Օհանեանը: Նախկին նախարարի հարցաքննութեան մանրամասներ ՊԵԿ-էն եւս  չէ հաղորդուած այսօր:

Ապրիլեան պատերազմի օրերուն Պաշտպանութեան նախարարութիւնը ղեկավարած Սէյրան Օհանեան, երէկ իրականացած զրոյցին ընթացքին վստահեցուցած էր, թէ ինքը տեղեակ չէ եղած, որ քառօրեայի ժամանակ բանակին ուղարկուած օգնութեան մէկ մասը ո՛չ թէ առաջնագիծ գացած է, այլ Մանուէլ Գրիգորեանի առանձնատուն: Օհանեան պնդած էր, որ նաեւ Ղարաբաղի իշխանութիւնները պէտք է պարզաբանեն, թէ ինչ ճանապարհով կրնար իւրացուիլ բանակի ունեցուածքը:

Ղարաբաղեան կողմէն Օհանեանի յայտարարութիւնը «անհասկնալի» որակած էին:

Այսօր, զրոյցին ընթացքին, Սէյրան Օհանեան վստահեցուցած է, թէ ինքը մեղադրանքներու սլաքը ղարաբաղեան իշխանութիւններուն վրայ ուղղելու նպատակ չէ ունեցած,- «Ի հարկէ՝ միանշանակ ո՛չ: Այդտեղ պէտք է պատասխանատւութիւն կրեն այն մարդիկ, որոնք իրականութեան մէջ տեղեակ եղած են այդ ամէն ինչէն կամ տեղեակ չեն եղած»:

Շարունակելով պարզաբանել իր երեկուան յայտարարութիւնները՝ պաշտպանութեան նախկին նախարարը նշած է,- «Պէտք է պարզել՝ նշուած նիւթական միջոցները իրենք ուրկէ՞ ստացած են, արդեօք Արցախէ՞ն կամ Հայաստանի Հանրապետութենէն: Արդեօք ճանապարհէ՞ն ետ վերադարձուած են եւ կամ Արցախի մէջ իրենք ստացած են զանոնք եւ ետ վերադարձուած, քանի որ այդ մեքենաները չէին կրնար ըլլալ պաշտպանութեան նախարարութեան, եթէ հաշուառուած ըլլային, միանշանակ անոնք պէտք է ըլլային պաշտպանութեան նախարարութեան մօտ»:

 

  • Facebook
  • Twitter
  • Delicious
  • LinkedIn
  • StumbleUpon
  • Add to favorites
  • Email
  • RSS