Հայոց Ցեղասպանութեան Մասին Խօսիլը Վիրաւորանք Չէ, Հերքելն է Վիրաւորանք. Փայլան 301-րդ Յօդուածով Իր Դէմ Սկսած Հետաքննութեան Մասին

garo

Թուրքիոյ խորհրդարանի հայ պատգամաւոր Կարօ Փայլան, որ Յունիս 24-ին կայանալիք խորհրդարանական ընտրութիւններու Ժողովուրդներու դեմոկրատական կուսակցութեան կողմէ առաջադրուած է Տիարպեքիրէն, թրքական bianet.org կայքին տուած հարցազրոյցի մը ընթացքին՝ խօսած է իր դէմ երկրի քրէական օրէնսգրքի տխրահռչակ 301-րդ յօդուածով սկսած հետաքննութեան մասին: Այս մասին կը հաղորդէ Armenpress.am–ը։

Փայլան նշած է, որ 301-րդ յօդուածը դարձած է պոլսահայ լրագրող Հրանդ Տինքի մահուան պատճառը:

«Հայոց Ցեղասպանութեան մասին խօսելու համար իմ դէմ սկսած է«թրքականութիւնը վիրաւորելու» հիմնաւորումով հետաքննութիւն: Իրականութեան մէջ, սակայն, Հայոց Ցեղասպանութիւնը հերքելն է վիրաւորանք: Անուանեցէք ինչպէս կ՝ուզէք՝ հայերու հետ տեղի ունեցած Մեծ ողբերգութիւնը հերքելը կը վիրաւորէ թրքականութիւնը»,- նշած է ան:

Փայլան կրկին ընդգծած է, թէ ողջ աշխարհը տեղեակ է, որ հայ ժողովուրդը ոչնչացուած է: «Անատոլիայի մէջ ամէն հինգէն մէկն էինք, իսկ հիմա անգամ հազարէն մէկը չենք: Մեր հազարաւոր եկեղեցիները, դպրոցները, մշակութային ժառանգութիւնը, ամէն բան կորսնցուցած ենք: Մենք կ՝առաջարկենք՝ դուք անուանեցէք տեղի ունեցած դէպքերը: Կ՝ըսենք՝ արդար յիշողութեան վրայ հիմնուած անուն դրէք կատարուածին: Սակայն, մեզի տրուող պատասխանը մշտապէս հետեւեալն է. «Դուն չես կրնար այս ամէնուն մասին խօսիլ»: Ու նմանօրինակ պայմաններու մէջ պարզ կը դառնայ, թէ կը վիրաւորես թրքականութիւնը: Պարզուած է այնպէս, որ թուրքերը աշխարհի մէջ կ՝ընկալուին, իբրեւ Ցեղասպանութիւնը հերքողներ: Իսկ ես, հակառակը, կը պայքարիմ թուրքերու դէմ այդ անարդարութիւնը վերացնելու համար»,- ըսած է խորհրդարանի հայ պատգամաւորը:

Թուրքիոյ քրտամէտ Ժողովուրդներու դեմոկրատական կուսակցութեան հայ պատգամաւոր Կարօ Փայլանի դէմ քրէական օրէնսգիրքի տխրահռչակ 301-րդ յօդուածով հետաքննութիւն սկսած է:

Յիշեցնենք, որ Թուրքիոյ քրէական օրէնսգրքի 301-րդ յօդուածը կ՝ենթադրէ քրէական պատասխանատւութեան ենթարկել այն անձերը, որոնք կը վիրաւորեն թուրք ժողովուրդը, պետութեան, թրքականութեան, երկրի պետական կառոյցները, զինծառայողներն ու իրաւապահները: Հայոց Ցեղասպանութեան մասին խօսելու համար ժամանակին Թուրքիոյ ՔՕ 301-րդ յօդուածով հետապնդումներու ենթարկուած էր «Ակօս» շաբաթաթերթի գլխաւոր խմբագիր Հրանդ Տինքը, թուրք պատմաբան Թաներ Աքչամը, գրականութեան Նոպէլեան մրցանակի դափնեկիր Օրհան Փամուքը եւ այլք։

  • Facebook
  • Twitter
  • Delicious
  • LinkedIn
  • StumbleUpon
  • Add to favorites
  • Email
  • RSS