Յունոտի Կիրճի Հրաշալիքները Աւելի Հասանելի Դարձան Զբօսաշրջիկներուն

hounod

Յունոտի կիրճը յայտնի է իբրեւ արցախցիներուն ու Արցախ ժամանած հիւրերու, զբօսաշրջիկներու կողմէ սիրուած վայր: Յունոտի կիրճին մէջ գտնուող «Զոնտիկներ» (հովանոցներ-Խմբ.) կոչուող իւրօրինակ տեսարժան վայր հասնիլը այսուհետեւ կարելի է աւելի կարճ, բարեկարգ ու ապահով արահետով: Ըստ «Ապառաժ»-ի՝ Արցախի մշակոյթի, երիտասարդութեան հարցերու եւ զբօսաշրջութեան նախարարութեան եւ Հայ լեռնագնացներու միութեան (Armenian hikes association) համագործակցութեամբ ոչ միայն բարեկարգուած է արահետը, այլ նաեւ կառուցուած է փայտէ ապահով կամուրջ՝ գետը անցանելի դարձնելու համար:

Նշենք, որ կամուրջի բացումը տեղի ունեցաւԿիրակի, 17 Յունիսին:

«Հայ լեռնագնացներու միութեան (Armenian hikes association) հետ իրականացուող համագործակցութիւնը շարունակական պիտի ըլլայ: Իբրեւ արդիւնք՝ Արցախի  հրաշալի բնութիւնն ու տեսարժան վայրերը աւելի հասանելի պիտի դառնան զբօսաշրջիկներուն: Յունոտի կիրճ տանող արահետի բարեկարգումը այս ծրագիրին  յաջող մեկնարկն է»,- նշեց բացման հանդիսութեան ներկայ գտնուող նախարար Սերգէյ Շահվերդեան:

Բարեկարգման գաղափարը ծագած է անցեալ տարի, երբ Թելմա Ալթուն Արցախ կը գտնուէր: Արշաւին ընթացքին հասնելով Յունոտի կիրճ՝ ան խոստացաւ, որ կամուրջներու հարցը պիտի լուծուի:

«Առաջին կամուրջը արդէն պատրաստ է: Կը ծրագրենք Շուշիէն մինչեւ Քարին տակ հատուածին վրայ երեք կամուրջ կառուցել: Բացի այդ, ծայրէ ծայր բարելաւուած է ամբողջ արահետը, դժուարանցանելի հատուածները փոխուած են, կառուցուած են նոր արահետներ»,- հպարտութեամբ յատնեց Հայ լեռնագնացներու միութեան ներկայացուցիչ Գէորգ Գասպարեան:

Յայտնենք, թէ երկրորդ փայտէ կամուրջի շինարարութիւնը պիտի սկսի Յուլիսին:

IMG_3744

IMG_3781

IMG_3689

IMG_3697

  • Facebook
  • Twitter
  • Delicious
  • LinkedIn
  • StumbleUpon
  • Add to favorites
  • Email
  • RSS