Տարբեր Աւիշ Արցախի Մէջ. «Հայրենիք»-ի Խմբագրական

p1-khemp

Յունիս 1-ի դէպքերն ու իրադարձութիւնները ուղղակի կապ ունին վերջին շաբաթներու Հայաստանի դէպքերուն հետ: Այն տարբերութեամբ, որ «Թաւշեայ Յեղափոխութեան» զանգուածային ցոյցերուն եւ խռովութիւններուն փոխարէն, շատ աւելի արագ եւ հմուտ կերպով կարելի եղաւ լուծման յանգիլ: Դեռ պիտի շարունակուին փոփոխութիւններն ու բարեկարգումները թափանցիկ քաղաքականութեան եւ ղեկավարութեան ի խնդիր: Տարբեր թաւիշի կարիք չկար, այլ պարզապէս տարբեր աւիշ ստեղծուեցաւ:
Կացութիւնը ստեղծուած գոյավիճակի մը արդիւնքն էր: Երկար ժամանակ պատասխանատու դիրքի վրայ գտնուող անձնաւորութիւններ սկսած էին հետզհետէ զոհը դառնալ իրենց միօրինակ գործելաձեւին, չգիտակցելով, որ մտածելակերպն ու գործելաձեւը անհանդուրժելի եւ անընդունելի կրնար դառնալ՝ տեղացիներու, սերնդակիցներու եւ դրացիներու քով:
Ի վերջոյ, սահմաններ պաշտպանելու համար կիրարկուած ձեւն ու խստութիւնը կարելի չէր գործադրել մայրաքաղաք Ստեփանակերտի մէջ, ուր երկու քաղաքացիներու միջեւ «կաթիլ մը մեղր»-ային ոճով եւ կենցաղային խորք ունեցող պարզ վիճաբանութիւն մը պատճառ դարձած էր, որ Ազգային Անվտանգութեան Ծառայութեան յատուկ ջոկատի տասնեակ մը անդամներ, երկու քաղաքացիներ ամենայն դաժանութեամբ ծեծեն:
Ստեղծուած ծանրակշիռ կացութիւնը բաւարար եղաւ փաստելու, թէ պատահածը չափազանց ընդվզեցուցիչ էր եւ այդպիսի վիճակ կարելի չէր պարտադրել մայրաքաղաքին մէջ: Ուստի, նախագահ Բակօ Սահակեան շեշտեց, որ բարեփոխումներու եւ քատրային փոփոխութիւններու շտապ անհրաժեշտութիւնը յառաջացած էր Արցախի մէջ:
Պարզուած էր, թէ անկայուն ու լարուած ներքին մթնոլորտ կարելի չէր ունենալ եւ յուսալի անվտանգութեան համակարգի ձգտիլ:
Արցախի Հանրապետութեան ոստիկանութեան պետի եւ Ազգային Անվտանգութեան Ծառայութեան տնօրէնի նշանակումները մաս կը կազմեն այս բարեփոխումներու շարքին, որոնք պիտի շարունակուին: Յստակ է, թէ այս ընդհանուր բարեփոխումներու ծիրին մէջ, յաւելեալ զարգացման գործընթաց ապահովելու անհրաժեշտութեան տեղ պիտի տրուի զանազան բնագաւառներու մէջ` քաղաքական, անվտանգութեան, տնտեսական, ընկերային երաշխիքներու եւ այլն:
Այսպէս, Արցախի Հանրապետութեան մէջ ստեղծուած է տարբեր աւիշ, բոլորովին տարբեր՝ «Երեւանեան Թաւիշ»-էն, սակայն նոյնքան կարեւոր, անհրաժեշտ եւ բնականաբար արդիւնաբեր:
Սակայն, այս բարեփոխումներէն ետք, գոյութիւն ունի արցախեան հիմնահարցի լուծումը, որ հետզհետէ աւելի կ՚արծարծուի միջազգային քաղաքական բեմահարթակին վրայ:

  • Facebook
  • Twitter
  • Delicious
  • LinkedIn
  • StumbleUpon
  • Add to favorites
  • Email
  • RSS