Պաքուն Չի Համակերպիր Արցախը Բանակցային Սեղան Վերադարձնելու Փաշինեանի Ըրած Յայտարարութեան Հետ

88116

Հայաստանի մէջ «թաւշեայ յեղափոխութեան» իբրեւ արդիւնք ստեղծուած նոր իրավիճակը երկսայր սուր է Պաքուի համար:

Մէկ կողմէն՝ Պաքուն իբրեւ այդպիսին չի ճանչնար իշխանութեան եկած նոր ուժերը, միւս կողմէ՝ Պաքուի մէջ չեն համակերպիր ՀՀ վարչապետ Նիկոլ Փաշինեանի՝ Ղարաբաղը բանակցային սեղան վերադարձնելու վերաբերեալ ըրած յայտարարութեան հետ: Այս մասին, ըստ Armenpress.am-ի, Յունիս 13-ին հրաւիրուած մամուլի ասուլիսի մը ընթացքին, ըսաւ ատրպէյճանագէտ Տաթեւիկ Հայրապետեան։ «Այս յայտարարութիւնը շատ ծանր տարին Պաքուի մէջ եւ սկսան արագօրէն արձագանգել: Անոր յաջորդեց Մամետեարովի այցը Փարիզ, ուր ան կը հաւաստիացնէր, որ իրենք պէտք է սահմանուած ձեւաչափով շարունակեն բանակցութիւնները»,- նշեց Հայրապետեան:

Անդրադառնալով այն հարցին, թէ Մինսկի խումբի համանախագահներուն այսօր՝ Յունիս 13-ին, Հայաստան կատարած այցը ինչ բնոյթ պիտի կրէ, եւ ինչ հարցերու պիտի անդրադառնան կողմերը, ատրպէյճանագէտը պատասխանեց, որ համանախագահներու այցը այս անգամ աւելի շատ ճանաչողական բնոյթ պիտի կրէ՝ հասկնալու համար, թէ  ինչ մտադրութիւններ կան առկայ գործընթացներուն մէջ: «Ղարաբաղեան հիմնախնդիրի կարգաւորման հետ կապուած՝ Հայաստանի մէջ յստակ նշած են, որ պատրաստ են բանակցութիւնները շարունակելու առկայ ձեւաչափով, եւ Ղարաբաղի բանակցութիւններու սեղան բերելն ալ աւելի շատ կապուած է բանակցութիւններու շօշափելի արդիւնքներ տեսնելու ցանկութեամբ»,- նշեց Հայրապետեան՝ աւելցնելով, որ համանախագահները ամէն ինչ պիտի ընեն յառաջիկային Ալիեւ-Փաշինեան հանդիպում կազմակերպելու համար:

Անդրադառնալով Նախիջեւանի մէջ ստեղծուած իրավիճակին՝ բանախօսը ըսաւ, որ Պաքուն կարծես միտումնաւոր կերպով կը սրէ իրավիճակը, եւ անոր ալ կը յաջորդէ Թուրքիոյ այն յայտարարութիւնը, թէ իրենք շուտով երկաթուղի պիտի կառուցեն դէպի Նախիջեւան: «Թուրքիան եւ Ատրպէյճանը պիտի փորձեն ազդեցութիւնը մեծցնել Նախիջեւանի մէջ: Պաքուն ամէն կերպով պիտի փորձէ շարունակել սադրանքները՝ ցոյց տալու համար, որ հայկական յեղափոխութիւնը իր վրայ մեծ ազդեցութիւն չէ ձգած եւ հարկ եղած պարագային պատրաստ է ռազմական գործողութիւններու վերսկսման դիմելու»,- ըսաւ Հայրապետեան:

  • Facebook
  • Twitter
  • Delicious
  • LinkedIn
  • StumbleUpon
  • Add to favorites
  • Email
  • RSS