Արցախի Կայունութիւնը Ամէն Ինչէ Վեր է. ՀՀ Նախագահ

armen-pago

Քիչ առաջ աւարտած է Արցախ ժամանած ՀՀ նախագահ Արմէն Սարգսեանի եւ ԱՀ նախագահ Բակօ Սահակեանի պաշտօնական հանդիպումը, որուն ընթացքին քննարկուած են Հայաստան-Արցախ փոխգործակցութեան առնչուող տարբեր հարցեր: Հանդիպումէն ետք ՀՀ նախագահը պատասխանած է լրագրողներու հարցերուն: Այս մասին կը հաղորդէ Artsakhpress.am-ը։

Արմէն Սարգսեան նշած է, որ շատոնց կը ծրագրէր քանի մը օրով իր ընտանիքի անդամներուն հետ այցելել Արցախ եւ ցոյց տալ մեծ մօր՝ Սաթենիկ մայրիկի ծննդավայրը՝ Ասկերանի շրջանի Հարաւ գիւղը:

«Այնպէս եղաւ, որ այսօր եկած եմ կարճ այցով, որպէսզի հանդիպիմ ԱՀ նախագահին եւ ըլլամ Արցախի կողքին: Ապրիլ-Մայիսին, երբ Հայաստանի մէջ սկսած էր թաւշեայ յեղափոխութեան գործընթացը, յաճախ Երեւան կը ժամանէր Բակօ Սահակեան եւ իր ներկայութեամբ բոլորիս կը յիշեցնէր, որ ազգային շահերը վեր են ամէն ինչէ: Բոլորս պէտք է ուշադիր ըլլանք, որպէսզի ծաւալուող իրադարձութիւնները որեւէ ձեւով չանդրադառնան Արցախի կայունութեան եւ անվտանգութեան: Իմ պարտքը կը համարեմ այսօր ըլլալու Արցախի մէջ՝ որեւէ ձեւով ցանկութիւն չունենալով խառնուելու Արցախի ներքաղաքական կեանքին: Ուրախութեամբ պէտք է նշեմ, որ Արցախը, իսկապէս, կայացած պետական միաւոր է, երկիր, որ ունի ժողովրդական հիմնարկներ, ընտրած խորհրդարան եւ նախագահ, ինչպէս նաեւ մարդիկ, որոնք ո՛չ միայն հպարտ են արցախցի ըլլալու համար, այլ որովհետեւ ունին կայացած պետութիւն: Յոյսով եմ՝ առկայ խնդիրները պիտի լուծուին հնարաւորինս արագ, որովհետեւ Արցախի կայունութիւնը վեր է ամէն ինչէ»,- նշած է Ա. Սարգսեան:

ՀՀ նախագահը նաեւ ընդգծած է, որ Հայաստանը եւ Սփիւռքը ուշադիր կը հետեւին արցախեան իրադարձութիւններուն:

«Արցախը մեր ողջ ժողովուրդի համար առանձնայատուկ նշանակութիւն ունի: Մենք որեւէ ձեւով իրաւունք չունինք պարտութիւն ունենալու այս հարցով: Վստահ եմ՝ բոլոր խնդիրները պիտի գտնեն լուծումներ»,- եզրափակած է Ա. Սարգսեան:

  • Facebook
  • Twitter
  • Delicious
  • LinkedIn
  • StumbleUpon
  • Add to favorites
  • Email
  • RSS