ՄԽ Համանախագահները Փաշինեանին Վստահեցուցած են, որ Պիտի Ներդնեն Բոլոր Ջանքերը ԼՂ Խնդիրի Խաղաղ Կարգաւորման Համար

88103

ՀՀ վարչապետ Նիկոլ Փաշինեանը ընդունած է Երեւան ժամանած ԵԱՀԿ Մինսկի խումբի համանախագահներ Իկըր Փոփովը (Ռուսիան), Էնտրիւ Շոֆերը (ԱՄՆ), Սթեֆան Վիսքոնթին (Ֆրանսա) եւ ԵԱՀԿ գործող նախագահի անձնական ներկայացուցիչ Անճէյ Գասպրչիքը: Այս մասին կը տեղեկացնեն ՀՀ կառավարութեան տեղեկատւութեան եւ հասարակայնութեան հետ կապերու վարչութենէն:

Վարչապետը կարեւոր համարած է համանախագահներու դերը ղարաբաղեան հակամարտութեան խաղաղ կարգաւորման բանակցային գործընթացին եւ համոզմունք յայտնած, որ պիտի ձեւաւորուի արդիւնաւէտ համագործակցութիւն:

Համանախագահները շնորհաւորած են Նիկոլ Փաշինեանը՝ ՀՀ վարչապետի պաշտօնին ընտրուելուն առիթով՝ վստահեցնելով, որ պիտի ներդնեն բոլոր ջանքերը ղարաբաղեան հիմնախնդիրի խաղաղ կարգաւորման հասնելու համար:

Հանդիպման մասնակիցները կարեւոր համարած են կողմերու հաւատարմութիւնը հակամարտութեան խաղաղ կարգաւորման ուղղութեամբ ստանձնած  յանձնառութիւններուն, ինչպէս նաեւ Վիեննայի, Ս. Փեթերզպուրկի եւ Ժընեւի գագաթնաժողովներուն ձեռք բերուած համաձայնութիւններու կատարման անհրաժեշտութիւնը:

ԵԱՀԿ Մինսկի խումբի համանախագահները վարչապետին տեղեկացուցած են իրենց յառաջիկայ աշխատանքային ծրագիրներուն վերաբերեալ։

Հանրապետութեան վարչապետը վերահաստատած է Հայաստանի պատրաստակամութիւնը՝ ԵԱՀԿ Մինսկի խումբի համանախագահներու հետ պիտի շարունակեն բանակցային խաղաղ ճանապարհով հակամարտութեան կարգաւորման ուղղուած ջանքերը:

Զրուցակիցները քննարկած են բանակցային գործընթացի առաջմղման համար համապատասխան մթնոլորտի ձեւաւորման ուղղութեամբ ձեռնարկուելիք քայլերը,  անդրադարձած հակամարտութեան գօտիի իրավիճակին:

  • Facebook
  • Twitter
  • Delicious
  • LinkedIn
  • StumbleUpon
  • Add to favorites
  • Email
  • RSS