ՄԽ Համանախագահները Մնացականեանին Ներկայացուցած են ԼՂ Խնդիրի Լուծման Իրենց Մօտեցումները

937241

ՀՀ արտաքին գործոց նախարար Զոհրապ Մնացականեան, Յունիս 12-ին, ընդունեց ԵԱՀԿ Մինսկի խումբի համանախագահներ Իկըր Փոփովը, Սթեֆան Վիսքոնթին, Էնտրիւ Շոֆերը եւ ԵԱՀԿ գործող նախագահի անձնական ներկայացուցիչ Անճէյ Գասպրչիքը։ Այս մասին կը  տեղեկացնեն ՀՀ արտաքին գործոց նախարարութեան մամուլի, տեղեկատւութեան եւ հասարակայնութեան հետ կապի վարչութենէն:

Արժեւորելով ԵԱՀԿ Մինսկի խումբի համանախագահներուն առաքելութիւնը՝ նախարար Մնացականեան կարեւոր համարեց այցը, ընդգծելով, որ անիկա հնարաւորութիւն կ՝ընձեռնէ անմիջական առաջին շփումը հաստատելու Հայաստանի մէջ նոր կառավարութեան ձեւաւորումէն ետք։ ՀՀ ԱԳ նախարարը վերահաստատեց Հայաստանի մօտեցումները եւ դիրքորոշումը կարգաւորման գործընթացին վերաբերեալ՝ շեշտելով, որ Հայաստանը հաւատարիմ է ԵԱՀԿ Մինսկի խումբի համանախագահութեան ծիրէն ներս ղարաբաղեան հիմնախնդիրի բացառապէս խաղաղ յանգուցալուծման։

Համանախագահները ՀՀ ԱԳ նախարարին ներկայացուցին հիմնահարցի յանգուցալուծման ջանքերուն վերաբերեալ իրենց փորձառութիւնն ու մօտեցումները։

Զրուցակիցները հանգամանալից մտքեր փոխանակեցին Լեռնային Ղարաբաղի հիմնահարցի կարգաւորման շուրջ, անդրադարձան բանակցային գործընթացի առաջմղման հնարաւորութիւններուն՝ այս ծիրէն ներս կարեւոր համարելով խաղաղութեան նպաստող մթնոլորտի ձեւաւորումը։

Անդրադառնալով նախօրէին սահմանագիծի վրայ Ատրպէյճանի կողմէ Արցախի ՊԲ զինծառայողի սպանութեան՝ նախարար Մնացականեան շեշտեց, որ նման սադրանքներով ատրպէյճանական կողմը լրջօրէն կասկածի տակ կը դնէ իր յանձնառութիւնը խաղաղ գործընթացին։

Քննարկուեցան եռանախագահներու ձեւաչափով իրականացուելիք յետագայ քայլերը։

  • Facebook
  • Twitter
  • Delicious
  • LinkedIn
  • StumbleUpon
  • Add to favorites
  • Email
  • RSS