Դժբախտ Զուգադիպութիւն. Թուրք Ամերիկացին կը Յարձակի Պուրտէնի Վրայ Անոր Անձնասպանութեան Նախօրէին

Harut-Sassounian-740-part-2-1

«Քալիֆորնիա Քուրիըր» (www.TheCaliforniaCourier.com) թերթի հրատարակիչ եւ խմբագիր Յարութ Սասունեան       

Ընկերներէս մէկը ինծի ուղարկած էր Նիւ Եորք բնակող թուրք ամերիկացի Իպրահիմ Քուրթուլուսի ծաւալուն նամակին պատճէնը՝ ուղղուած CNN-ի հարիւրաւոր աշխատակիցներու, ուր ան խստօրէն քննադատած էր Էնթընի Պուրտէնը, Քրիս Քուոմոն եւ ուրիշներ՝ Հայոց Ցեղասպանութեան ճանաչման համար: Քուրթուլուսի ելեկտրոնային նամակին թեման վերնագրուած էր՝ «Երբ CNN-ի Քրիս Քուոմոն եւ «յատկապէս» Էնթընի Պուրտէնը կ՝օրինականցնեն ՌԱՍԻԶՄԸ»:

Դժբախտ զուգադիպութեամբ, թրքական նամակը ուղարկուած է 2018 Յունիս 5-ին՝ Պուրտէնի անձնասպանութիւն գործելէն ընդամէնը երեք օր առաջ… Հաշուի առնելով, որ վերջին օրերուն մեծ թիւով հայեր եւ օտարներ գրած էին՝ անհիմն կասկածներ յայտնելով, թէ Պուրտէնի մահուան պատճառը Ատրպէյճանը կամ Թուրքիան են, կ՝ուզեմ յստակացնել, որ ես չեմ հաւատար նման դաւադրութիւններու: Դժբաքտաբար, Պուրտէնը, որ տարիներ շարունակ թմրանիւթեր օգտագործած էր, մոլի խմող էր եւ տառապած է լուրջ ճնշախտէ, անցեալ շաբաթ անձնասպանութիւն գործեց հիւրանոցի իր սենեակին մէջ՝ Ֆրանսա կատարած այցին ժամանակ:

Նաեւ, անոնք, որոնք կը քարոզեն այդ դաւադրութիւնները, վնաս կը հասցնեն հայկական շահերուն: էնթընի Պուրտէնը, որ «Անծանօթ վայրեր» ճամբորդական եւ խոհարարական յայտնի ներկայացում ունէր CNN հեռուստաընկերութեան մէջ, յայտնուած էր Ատրպէյճանի «սեւ ցուցակ»-ին մէջ՝ անցեալ տարի Հայաստան կատարած այցէն ետք Արցախ մեկնելուն համար: Հեռուստահաղորդումը անցեալ ամիս ցուցադրուեցաւ CNN-ով, մեծ հրճուանք պատճառելով հայերուն եւ յառաջացնելով ատրպէյճանցիներու ու թուրքերու վրդովմունքը: Ենթադրելով, թէ Ատրպէյճանը սպաննած է Պուրտէնը՝ հայերը պարզապէս օտարները կը տարհամոզեն Արցախ այցելելու…

Քուրթուլուսը յարձակած է CNN-ի Քրիս Քուոմոյի վրայ՝ անոր հաղորդման ընթացքին քոնկրէսական Ադամ Շիֆի (դեմոկրատ, Քալիֆորնիա) հետ հարցազրոյց ընելուն համար: Քուրթուլուսը Շիֆը ներկայացուցած էր իբրեւ «ռասիստ»՝ Հայոց Ցեղասպանութեան ճանաչման աջակցութեան համար եւ համեմատած Քու-Քլուքս-Քլանի Տէյվիտ Տիւգի հետ: Այնուհետեւ, Քուրթուլուսը քննադատած է քոնկրէսական Նենսի Փելոսին (դեմոկրատ, Քալիֆորնիա)՝ 2016-ին անոր յայտարարութեան մէջ Հայոց Ցեղասպանութեան ճանաչման համար: Քուրթուլուսը ծիծաղելիօրէն պնդած է, որ Ցեղասպանութեան ժամանակ հայերը հաւանաբար մահացած են «ծերութենէն», այլ ոչ թէ սպանութիւններէն…

Քուրթուլուսը նաեւ իր զայրոյթը թափած է Էմի Կուտմէնի վրայ, որ կը վարէ «Ժողովրդավարութիւնը հիմա»  մրցանակակիր ռատիո-հեռուստատեսային լուրերու ծրագիրը, որ եթեր կը հանուի Հիւսիսային Ամերիկայի 900 հանրային հեռարձակման կայեաններով՝ իր հաղորդման ընթացքին Հայոց Ցեղասպանութեան ճանաչման համար:

Քուրթուլուսը ոչ միայն հերքած է Հայոց Ցեղասպանութեան իրողութիւնը՝ զայն անուանելով «կեղծիք», այլեւ մեղադրած է հայերը՝ «թուրքերու դէմ ոչնչացման արշաւ» կազմակերպելու համար… Ան նաեւ կեղծօրէն պնդած է, որ «հայերու դէմ համակարգուած բնաջնջման արշաւը ոչ միայն անհաւանական էր, այլեւ՝ անհնարին…»:

Այնուհետեւ, Քուրթուլուսը քննադատած է Էնթընի Պուրտէնը՝ Սերժ Թանկեանի ուղեկցութեամբ Հայաստան եւ Արցախ կատարած այցելութիւններուն համար: Քուրթուլուսը Թանկեանը ներկայացուցած է իբրեւ «հայ-ամերիկեան ռոք խումբի (System of a Down) անդամ, որուն հիմնական նենգ նպատակն է ռոքի սիրահար աշխարհի երիտասարդներուն ուղեղի լուացումը՝ «Հայոց Ցեղասպանութիւն»-ը ընդունելու համար»: Այնուհետեւ, Քուրթուլուսը մեղադրած է Պուրտէնը՝ «այդ ատելութեան ողջ քարոզչութիւնը իր դրուագին մէջ  (https://www.youtube.com/watch ?v=A3oEJjTbDpo) կրկնելուն համար»:

Վըրճինիա նահանգի Չարլոթվիլի սպիտակ «սուբրեմասիստներ»-ու հետ Պուրտէնը համեմատելէ ետք, Քուրթուլուս կը հարցնէ՝ «ի՞նչ է տարբերութիւնը»: Դժբախտաբար, Քուրթուլուս զրպարտած է մէկը, որ պաշտպանած է Հայոց Ցեղասպանութեան հաւաստիութիւնը: Ուրիշները մեղաւոր չեն, որ Օսմանեան Թուրքիոյ կառավարութիւնը կազմակերպած էր հայ ժողովուրդին բնաջնջումը: Եթէ ատոր հետեւանքով թուրք ժողովուրդը ձեռք բերած է սարսափելի վարկ, սխալ է այդ պատճառով մեղադրել հայ զոհերը: Քուրթուլուսի փաստարկը համարժէք է այն բանին, որ դատապարտեն բոլոր անոնց, որոնք կը խօսին Հրէական հոլոքոսթին մասին, քանի որ ատիկա կրնայ վնասել գերմանացիներուն վարկը…

Այնուհետեւ, Քուրթուլուս անարգած է Հայոց Ցեղասպանութեան մասին գրած բոլոր մտաւորականները, ներառեալ դեսպան Հենրի Մորկընթաուը, որ իր «Ազգի մը սպանութիւնը» գիրին մէջ գրած է ականատեսի վկայութիւնները: Ատոր փոխարէն, Քուրթուլուս գովերգած է այսպէս կոչուած «մտաւորականներ»-ը, որոնք ցեղասպանութեան ժխտողներ են՝ թրքական կառավարութեան նիւթական աջակցութեամբ:

Քուրթուլուս իր նամակը աւարտած է Պուրտէնի հասցէին ուղղուած յաւելեալ վիրաւորանքներով. «Եթէ ես ապրէի աւելի քիչ ռասիստական երկրի մէջ, Էնթընի Պուրտէնը անյապաղ պիտի կորսնցնէր իր աշխատանքը: Սակայն, խնդիրը կապուած չէ միայն ատելութեամբ լի մոլեռանդներու հետ, ինչպէս Էնթընի Պուրտէնը. ինչո՞ւ (CNN-ի) նախագահ Ճէֆ Ցուգըր, որ նոյնպէս ստացած է մեր հաղորդագրութիւնները, կ՝արտօնէ Պուրտէնի արատաւոր ռասիզմը»:

Քուրթուլուս մեղադրած է նաեւ CNN-ի այլ աշխատակիցներ, որոնք չեն բողոքած՝ «Էնթընի Պուրտէնի անպատասխանատւութեան, ատելութեան եւ կաշառակերութեան փաստերուն դէմ…. Ինչպէ՞ս կրնային CNN-ի լրագրողները հանդուրժել Էնթընի Պուրտէնի նախապաշարմունքները, ինչպէս նաեւ փաստերուն կեղծումը»:

Քուրթուլուսի բազմաթիւ կեղծիքներու եւ խեղաթիւրումներու դէմ հակադրուելու փոխարէն՝ ես պարզապէս մէջբերում կ’ընեմ Թուրքիոյ Հանրապետութեան հիմնադիր Քեմալ Աթաթուրքէն, որ 1926 Օգոստոս 1-ին, Los Angeles Examiner թերթին մէջ հրապարակուած հարցազրոյցին մէջ խոստովանած է. «Նախկին Երիտթուրքերու կուսակցութեան այս մնացորդները, որոնք պէտք է պատասխան տան մեր միլիոնաւոր քրիստոնեայ հպատակներու կեանքին համար, որոնց զանգուածաբար դաժանաբար քշեցին իրենց տուներէն եւ կոտորեցին, չեն ենթարկուիր հանրապետական իշխանութեան: Անոնք մինչ օրս ապրած են թալանով, կողոպուտով եւ կաշառակերութեամբ ու թշնամաբար վերաբերած են իւրաքանչիւր գաղափարի կամ առաջարկի՝ լծուելու օգտակար աշխատանքի եւ վաստակելու իրենց ապրուստը իրենց ճակատի արդար քրտինքով»։

Քանի որ ես Քուրթուլուսի ելեկտրոնային նամակին պատճէնը ստացած եմ CNN-ի հարիւրաւոր ելեկտրոնային փոստի հասցէներու ամբողջական ցանկին հետ միասին, որոնց ան ուղարկած էր իր ելեկտրոնային նամակը, ես իմ յօդուածը կ’ուղարկեմ միեւնոյն ելեկտրոնային փոստի հասցէներով, որպէսզի Քուրթուլուսը չխաբէ CNN- ի լրագրողները:

Թարգմանութիւնը կատարեց Ռուզաննա Աւագեան

Արեւմտահայերէնի վերածեց ԵՌԱԳՈՅՆ-ը

  • Facebook
  • Twitter
  • Delicious
  • LinkedIn
  • StumbleUpon
  • Add to favorites
  • Email
  • RSS