Մարտունի Քաղաքի Հնավայրին Մէջ Երեք Նոր Տապանաքար Յայտնաբերուած է

937085

Գեղարքունիքի մարզի Մարտունի քաղաքի հնավայրերէն մէկուն՝ Գոմեր կոչուող հանդամասին վրայ, ՀՀ մշակոյթի նախարարութեան «Պատմամշակութային արգելոց-թանգարաններու եւ պատմական միջավայրի պահպանութեան ծառայութիւն» ՊՈԱԿ Գեղարքունիքի մարզային ծառայութեան նախաձեռնութեամբ, Մարտունիի քաղաքապետարանի եւ Հայ առաքելական եկեղեցւոյ Գեղարքունեաց թեմի մասնակցութեամբ, պատմութեան յուշարձանի տարածքին վրայ, հողի շերտէն մաքրուած է 12 տապանաքար եւ կանգնեցուած է 7 գեղաքանդակ խաչքար:

Ըստ Խոսրով Խլղաթեանի՝ խաչքար-տապանաքարերու մաքրման եւ կանգնեցման աշխատանքներուն մասնակցած են ՀՀ մշակոյթի նախարարութեան «Պատմամշակութային արգելոց-թանգարաններու եւ պատմական միջավայրի պահպանութեան ծառայութիւն» ՊՈԱԿ Գեղարքունիքի մարզային ծառայութեան պետ Գոռ Գասպարեան, Գեղարքունեաց թեմի առաջնորդական տեղապահ Կիրակոս վարդապետ Դաւթեան, Մարտունիի քաղաքապետ Արմէն Աւետիսեան, Մարտունիի քաղաքապետարանի աշխատակիցներ: Քանի մը խաչքար՝ մեծ չափերու պատճառով՝ բարձրացուած են եւ կանգնեցուած վերամբարձ կռունկի օգնութեամբ:

«Մարտունի քաղաքէն դէպի հարաւ եւ Մարտունի-Գետափ ճանապարհի արեւելեան կողմը գտնուող բնակավայրը խոր հնադարէն աշխոյժ բնակեցուած եղած է մինչեւ մեր թուարկութեան 18-րդ դարը, որուն մասին կը վկայեն խաչքարերու կամ տապանաքարերու վրայ պահպանուած արձանագրութիւնները:

Բնակավայրը լքուած է մահմետական ցեղերու աւերիչ ասպատակութիւններուն հետեւանքով: Տարածքին վրայ կը պահպանուին մօտ հինգ տասնեակ յուշարձաններ եւ տապանաքարեր, որոնք կը թուագրուին ՔԱ 9-18-րդ դարերով, սակայն որոշ յուշարձաններ ալ, որոնք չունին արձանագրութիւններ, իրենց ոճով կը յիշեցնեն աւելի վաղ ժամանակները: Այդ յուշարձանները ընդգրկուած են պետական պահպանութեան ցուցակին մէջ: Մեր կատարած աշխատանքներուն մէջ կարեւորը այն եղաւ, որ կանգնեցուած 7 խաչքարէն 3-ը ընդգրկուած չէին պետական պահպանութեան ցուցակին մէջ: Անոնք արդէն պիտի ստանան պետական արձանագրութիւն եւ ուսումնասիրութեան նիւթ դառնան մասնագէտներու համար: Չի բացառուիր, որ հնագիտական ուսումնասիրութիւններու պարագային այստեղ հողի շերտի տակ գտնուող նոր ու կարեւոր յուշարձաններ յայտնաբերուին»,- նշած է Գեղարքունիքի մարզի պատմական միջավայրի պահպանութեան ծառայութեան պետ Գոռ Գասպարեան:

 

 

 

  • Facebook
  • Twitter
  • Delicious
  • LinkedIn
  • StumbleUpon
  • Add to favorites
  • Email
  • RSS