Ո՛չ Թրքականին…

made in Turkey red stamp isolated on white backgroundՊԵՏԻԿ

Այո՛, բոլորս միակամ միանանք մեր պատանեկան միութիւններուն ու բարձրաձայն յայտարարենք` «Ո՛Չ ԹՐՔԱԿԱՆԻՆ…»:

Մեծ ուրախութեամբ եւ նոյնիսկ յուզումով լսեցի լիբանանեան լուրերու շարքին, որ Լիբանան կ՛արգիլէ թրքական արտադրութիւններու մուտքը երկիր, մասնաւորապէս` ուտեստեղէններու, տուրմ եւ պիսքուիի տեսակներ, նոյնիսկ ձաւար եւ անշուշտ` հագուստեղէն… Ինչո՞ւ, որովհետեւ այդ անորակ արտադրութիւնները վնաս հասցուցած են լիբանանեան մեր արտադրութիւններուն ու վնաս պատճառած` ճարտարարուեստին եւ տնտեսութեան:

Շա՛տ ապրին Լիբանանը, ողջմիտ տնտեսագէտներն ու իրատես նախարարները:

Վերջերս յօդուած մը գրած էի «Ամօթն ու անամօթը» վերնագրով, որ չհրատարակուեցաւ հաւանաբար մեր երեսփոխանական ընտրութիւններու շրջանին զուգադիպելուն համար, երբ հրատարակութեան նախապատուութիւնը կը տրուէր այդ հրատապ հարցին:

Ողջ մնայ մեր կառավարութիւնը, որ իմ առջեւ  դռները լայն բացաւ բարձրաձայն յայտարարելու, որ մենք իբր լիբանանահայեր եւ, անշուշտ, իբրեւ օրէնքին հնազանդ ազգայիններ` մեր վաճառատուներուն մէջ պիտի չվաճառենք թրքական արտադրութիւններ` չքաջալերելու համար այդ ստոր երկրին անորակ արտադրութիւններն ու տնտեսութիւնը, այդ մեծ ամօթ եւ աններելին է մանաւանդ մեզի` հայերուս համար, նոյնպէս` փակել դռները այն հայերուն գովաբանութիւններուն առջեւ, որոնք կը գովաբանեն ու կը քաջալերեն արիւն բուրող թրքական արտադրութիւնները:

Մենք հպարտօրէն տօնեցինք Հայաստանի Ա. Հանրապետութեան հարիւրամեակը` Սարդարապատի անհաւասար կռուի մեր հրաշք յաղթանակով պսակուած, որ ծնունդ տուաւ հայ պետականութեան, իսկ ոճրագործ Թուրքիան տակաւին կը շարունակէ ուրանալ իր մեծ ոճիրը… Մերժենք ամէն ինչ, որ թրքական է, մանաւանդ չհետեւինք թրքական հեռատեսիլի գարշահոտ յայտագիրներուն, որոնք կ՛ապականեն մեր տուները, ուր մենք կոչուած ենք հայկական ոգիով դաստիարակել մեր զաւակները` զանոնք ուղղելով դէպի այն, ինչ որ հայկական է` այսպիսով մաքուր պահելով մեր հայաբնակ թաղերուն մթնոլորտը:

Բոլորս միանանք մեր պատանիներուն եւ միաձայն կոչենք` «Ապրի՛ Լիբանանը, միշտ մերժենք թրքականը»:

  • Facebook
  • Twitter
  • Delicious
  • LinkedIn
  • StumbleUpon
  • Add to favorites
  • Email
  • RSS