Ատրպէյճանական Ծագումով Ամերիկացի Ատիլ Պագիրովը 250 Հազար Տոլար Ստացած է Ատրպէյճանի Օգտին Լոպպինկ Ընելու Համար

Harut Sassounian

«Քալիֆորնիա Քուրիըր» (www.TheCaliforniaCourier.com) թերթի հրատարակիչ եւ խմբագիր Յարութ Սասունեան     

Իմ անցեալ շաբթուան յօդուածով՝ ԱՄՆ-ի մէջ Ատրպէյճանի օգտին լոպպինկի համար գաղտնի ֆինանսաւորման մասին, ես անդրադարձած էի այն վարձատրութեան, որ տրուած է «նախագահ Ալիեւի հետ սերտ կապեր ունեցող քարիւղի եւ կազի հարցերով ազդեցիկ խորհրդատուի մը, որ ինքզինք կը ներկայացնէ իբրեւ գաղթականի յաջող պատմութիւն ունեցող եւ կ՝ապրի Օհայօ նահանգի Տէյթոն քաղաքին մէջ, միեւնոյն ժամանակ լոպպինկ կ՝ընէ ԱՄՆ-ի կառավարութեան՝ իր հայրենիքի օգտին»:

Ճոնի Ռէյթ, OCCRP.org (Կազմակերպուած յանցագործութեան եւ կաշառակերութեան լուսաբանման նախագիծի) համացանցային կայքին մէջ հրապարակուած իր «Պաքուի մարդը Ամերիկայի մէջ» յօդուածով, մանրամասնութիւններ ներկայացուցած է Ատիլ Պագիրովի գործունէութեան եւ խոշոր վարձատրութեան մասին, որ ան ստացած էր ատրպէյճանական աղբիւրներէն՝ Միացեալ Նահանգներու մէջ Ատրպէյճանի օգտին լոպպինկ ընելու համար:

Ռէյթ հաղորդած է, որ Պագիրովը՝ «ատրպէյճանական սփիւռքի աշխոյժ անդամներէն մէկը, ստացած է 253 150 տոլարի փոխանցում ամիսներ անց, երբ Հիւսթընի մէջ գտնուող իր ղեկավարած «ԱՄՆ ատրպէյճանցիներու ցանց» կազմակերպութիւնը, Ատրպէյճանի մայրաքաղաք Պաքուի մէջ, համաժողով կազմակերպած է, որուն մասնակցած է Քոնկրէսի 10 անդամ: Գործուղումը լայն քննադատութեան արժանացած է եւ հետաքննուած Ներկայացուցիչներու պալատի բարոյագիտութեան յանձնաժողովին կողմէ՝ Ատրպէյճանի պետական ​​քարիւղային ընկերութեան գաղտնի ֆինանսաւորման պատճառով…. Պագիրովի ստացած գումարներուն իրական ծագումը անյայտ է՝ թաքնուած գաղտնի, կեղծ ընկերութիւններու ետին: Սակայն, կան բաւարար ապացոյցներ, որ անոնց ետին կանգնած է մենատիրական երկրի իշխող վերնախաւը»:

Պագիրով, որ «օգնած է նաեւ Ուաշինկթընի մէջ կայացած այլ ամերիկա-ատրպէյճանական համաժողովներու կազմակերպման, բազմիցս վկայութիւններ տուած է Ներկայացուցիչներու պալատին առջեւ՝ յօգուտ Ատրպէյճանի ԱՄՆ ռազմական օգնութիւն տրամադրելու համար, ծառայած է իբրեւ Քոնկրէսի ատրպէյճանական խումբի համակարգող եւ կարեւոր տեղ գրաւած է Հիւսթընի մէջ գտնուող ընկերութեան մէջ, որ կը պնդէ, թէ կազմակերպած է երկրի նախագահ Իլհամ Ալիեւի այցը Սպիտակ տուն», գրած է Ռէյթ:

Պագիրով եւ անոր ընտանիքը մեծ կապեր ունին նախագահ Իլհամ Ալիեւի հետ, որ զինք պարգեւատրած է մետալով՝ ԱՄՆ-ի մէջ Ատրպէյճանի օգտին իր մատուցած ծառայութիւններուն համար: Այնուամենայնիւ, Պագիրով չէ արձանագրուած իբրեւ լոպպիստ, ինչպէս կը պահանջուի ԱՄՆ օրէնքով՝ համաձայն «Օտարերկրեայ գործակալներու արձանագրութեան մասին» օրէնքին (FARA): Երբ OCCRP-ի լրագրողները դիմած էին Պագիրովին, ան ըսած էր, որ իրենց գործը չէ, թէ ուրկէ վարձատրուած է:

Պագիրով Միացեալ Նահանգներ տեղափոխուած է 16 տարեկանին: Ան աւարտած է Հարաւային Քալիֆորնիայի համալսարանը՝ միջազգային յարաբերութիւններու եւ տնտեսութեան կառավարման գծով: Յետագային՝ քաղաքագիտութեան դոկտորի կոչում ստացած է Մոսկուայէն: Հետաքրքրական է, որ Պագիրով ընտրուած է Տէյթոնի դպրոցի խորհուրդի անդամ, այդ պաշտօնը զբաղցնելով մինչեւ 2017 եւ պաշտօնաթող եղած է իր ժամկէտէն աւելի քան մէկ ամիս առաջ, երբ աքթիվիսթ Տէյվիտ Էսրաթին յայտնաբերած է, որ ան կեղծած է իր բնակութեան հասցէն:

Ռէյթ բացայայտած է, որ Պագիրովի ղեկավարած Turbillion LLC խորհրդատուական ընկերութիւնը ստացած է 253 150 տոլար վարձատրութիւն Hilux Services կեղծ ընկերութենէն, որ մաս կը կազմէ «ատրպէյճանական լուացքատան»: Turbillion-ը արձանագրուած է Վայոմինկի մէջ՝ «նահանգ մը, որ յայտնի է այն մարդոց ծիրին մէջ, որոնք կ՝ուզեն ստեղծել գաղտնի ընկերութիւններ՝ հարկերէն ազատ խթաններու եւ գաղտնիութեան ապահովման պատճառով»: Վայոմինկի մէջ գտնուող եւ Պագիրովի կողմէ վերահսկուող այլ՝ Nobel Brothers Pictures LLC անունով ընկերութիւնը՝ իբր հալիվուտեան ֆիլմ կ՝արտադրէ ատրպէյճանական քարիւղային արդիւնաբերութեան պատմութեան մասին»:

Պագիրովի կողմէ 253 150 տոլար ստանալէն վեց ամիս առաջ, Հիւսթընի մէջ գտնուող շահոյթ չհետապնդող անոր «ԱՄՆ ատրպէյճանցիներու ցանցը» (USAN) «օգնած է «երկօրեայ համաժողով կազմակերպելու Պաքուի մէջ՝ «ԱՄՆ-Ատրպէյճան յարաբերութիւնները. ապագայի տեսլականը» թեմայով: Ռէյթ պարզած է, որ USAN-ը նաեւ երկու այլ համաժողով կազմակերպած է Ուաշինկթընի մէջ:

«Պաքուի մէջ 2013-ի հանդիպման ներկայ եղած են ԱՄՆ Քոնկրէսի 11 անդամներ, որոնցմէ տասը վճարուած են անոր համար, իսկ 30-էն աւելի անոնց աշխատակիցները, որոնց՝ «Ուաշինկթըն փոսթ»-ի ձեռք բերած Քոնկրէսի բարոյագիտութեան գրասենեակի գաղտնի զեկոյցին համաձայն՝ շռայլօրէն նուիրած են մետաքսէ շալեր, բիւրեղապակեայ թէյի սպասքներ եւ ատրպէյճանական գորգեր՝  2500-10000 տոլար արժողութեամբ», հաղորդած է Ռէյթ:

Բացի այդ, Պագիրով աշխատած է քոնկրէսական Քուրդ Ուելտընի (հանրապետական, Փենսիլվանիա) համար, իբրեւ յատուկ խորհրդական Ռուսիոյ եւ նախկին Խորհրդային Միութեան հարցերով: Ուելտըն իր պաշտօնը կորսնցուցած է 2006-ին՝ «Արդարադատութեան բաժանմունքին կողմէ զինք հետաքննելէ ետք, անոր աղջկան լոպպիստական ընկերութեան ենթադրաբար գրեթէ մէկ միլիոն տոլարի խորհրդատուական պայմանագրերու ուղղորդման համար, ռուսական երկու ընկերութիւններէն եւ սերպական հիմնադրամէ մը», յայտնած է Ռէյթ: 2004-ին Ուելտըն ստեղծած է Ատրպէյճանի քոնկրէսական խումբը, գործընկեր քոնկրէսական Սոլոմոն Օրդիզի (դեմոկրատ, Թեքսաս) հետ միասին, որ յետագային աշխատած է իբրեւ լոպպիստ Ատրպէյճանի համար: Պագիրով «աշխատած է իբրեւ խումբի համակարգող եւ կ՝ենթադրուի, որ 2003 եւ 2004 թթ. Քոնկրէսի պատուիրակութիւններուն հետ ճամբորդած է դէպի նախկին Խորհրդային Միութիւն»:

Բացի այդ, Ռէյթ յայտնած է, որ «2008-2016 թուական ինկած ժամանակահատուածին, Պագիրովը նաեւ գրեթէ ամէն տարի հրաւիրած են՝ օտարերկրեայ տնտեսական եւ ռազմական օգնութեան պիւտճէներ առաջարկելու Ատրպէյճանի եւ Հայաստանի համար Ներկայացուցիչներու պալատի պետութեան, արտաքին գործառնութիւններու եւ յարակից ծրագրերու յատկացումներու ենթայանձնաժողովին: Քանի մը տարի, USAN-ի եւ Պագիրովի այլ՝ ոչ առեւտրային կազմակերպութեան՝ Ղարաբաղի հիմնադրամի այլ ներկայացուցիչներ եւս վկայութիւն տուած են»: Քոնկրէսի մէջ տուած իր վկայութիւններով՝ Պագիրով կոչ ըրած է ԱՄՆ Քոնկրէսին զերոյացնելու Հայաստանին տրուող օգնութիւնը, մինչդեռ խնդրելով, որ Ատրպէյճանը ստանայ 26 միլիոն տոլար USAID-էն եւ 3,9 միլիոն տոլար ռազմական օգնութիւն:

Պագիրով նաեւ միջազգային կապերու գծով գործադիր փոխնախագահ եղած է Համաշխարհային ռազմավարական ուժանիւթի կազմակերպութեան մէջ, որ Հիւսթընի մէջ գտնուող ընկերութիւն է եւ կ՝առաջարկէ «ուժեղ գործարար եւ քաղաքական կապեր»՝ հեռանկարային յաճախորդներուն օգնելու օգտուիլ ածխաջրածինի զարգացման ընձեռած հնարաւորութիւններէն «քաղաքականապէս բարդ երկիրներու մէջ», ներառեալ՝ Ատրպէյճանի:

ԱՄՆ Արդարադատութեան բաժանմունքէն պէտք է պահանջել, որ հետաքննէ Ատրպէյճանի օգտին Միացեալ Նահանգներու մէջ Պագիրովի չարձանագրուած լոպպիստական գործունէութիւնը, պարզելու համար, թէ արդեօք որեւէ անօրինական գործողութիւն կատարուած է…

Թարգմանութիւնը կատարեց Ռուզաննա Աւագեան

Արեւմտահայերէնի վերածեց ԵՌԱԳՈՅՆ-ը

  • Facebook
  • Twitter
  • Delicious
  • LinkedIn
  • StumbleUpon
  • Add to favorites
  • Email
  • RSS