Հայերը Տիարպեքիրի Ոչ Թէ Հիւրերն են, Այլ Բնիկները. Տէմիրթաշ

Diarbekir

Թուրքիոյ քրտամէտ «Ժողովուրդներու ժողովրդավարական կուսակցութեան» (ԺԺԿ-HDP) նախկին համանախագահ Սելահաթթին Տէմիրթաշ, որ այժմ կը գտնուի բանտ, հարցազրոյց մը տուած է «Ակօս» թերթին:

Տէմիրթաշ անդրադարձած է Տիարպեքիր քաղաքի մէջ հայերու պատմութեան, ինչպէս նաեւ  հայ պատգամաւոր Կարօ Փայլանին: Վերջինս պիտի մասնակցի Թուրքիոյ մէջ Յունիս 24-ին տեղի ունենալիք արտահերթ խորհրդարանական ընտրութիւններուն: Ան Տիարպեքիրէն առաջադրուած է որպէս պատգամաւորի թեկնածու:

«Ակօս»-ի թղթակից Ոյգար Կիւլթեքինի հետ զրոյցի ընթացքին Տէմիրթաշ մասնաւորապէս ըսած է.

«Կարոն Տիարպեքիրին կը վայելէ , իսկ Տիարպեքիրը` Կարոյին:  Ժամանակին Տիարպեքիրի մէջ շատ մշակոյթներ եւ ինքնութիւններ կային: Տիարպքիրէն Կարոյի պատգամաւոր ըլլալը տխուր պատմութեան տրուած ամբողջական պատասխան է: Համոզուած եմ Տիարպեքիրի ժողովուրդը Կարոյին պիտի հիւրընկալէ պատմական գիտակցութեամբ  եւ ոգեւորուածութեամբ: Կարոն Տիարպեքիրի համար օտար չէ:  Կը հաւատամ, որ անոր եւ Տիարպեքիրի երիտասարդներու միջեւ պիտի ստեղծուի լաւ հաղորդակցութիւն: Իրեն յաջողութիւն կը մաղթոեմ: Հայերը Տիարպեքիրի ոչ թէ հիւրերն են, այլ բնիկները»:

Տէմիրթաշ նաեւ ըսած է, որ անցեալին Տիարպեքիրը բազմազգ բնակավայր էր, եւ նոյնիսկ իր մանկութեան ժամանակ հայեր կային այնտեղ:  ըստ անոր` բացի  Հայոց Ցեղասպանութենէն, տեղի հայերու արտագաղթի պատճառ դարձաւ նաեւ Թուրքիոյ մէջ 1980-90 թուականներու տեղի ունեցած իրադարձութիւնները: Բռնաճնշումներու հետեւանքով  հայերը լքեցին իրենց բնակավայրերը:

  • Facebook
  • Twitter
  • Delicious
  • LinkedIn
  • StumbleUpon
  • Add to favorites
  • Email
  • RSS