Համբիկ Սասունեանը Պայմանական Ազատ Արձակելու Գործով Քալիֆորնիոյ Մէջ Լսումներ Տեղի Պիտի Ունենան

hampig sasunianՔալիֆորնիոյ մէջ Յունիս 29-ին բանտարկեալներու ներման դիմումները քննող խորհուրդը պիտի քննէ լիբանանահայ Համբիկ Սասունեանի գործը. ան ցմահ ազատազրկման դատապարտուած էր 1982 թուականին Լոս Անճելըսի մէջ Թուրքիոյ գլխաւոր հիւպատոսի սպանութեան համար: Ինչպէս կը հաղորդէ «Արմենփրես»-ը, այս մասին կը յայտնէ Քալիֆորնիոյ քրէակատարողական վարչութեան պայմանական ազատ արձակման հարցերով խորհուրդի պաշտօնական կայքը:

Հիւպատոս Քեմալ Արըքանը սպաննուած էր Լոս Անճելըսի մէջ իր ինքնաշարժին մէջ կարմիր լոյսի տակ գտնուելու ժամանակ: Անոր վրայ կրակած երկու անձերէն մէկը Սասունեանն էր: Սպանութենէն ետք «Հայոց Ցեղասպանութեան արդարութեան մարտիկներ» խումբը զանգահարած էր տեղի լրատուամիջոցներուն ու ստանձնած սպանութեան պատասխանատւութիւնը:

Սպանութեան հետաքննութեան ժամանակ դատախազները նշած էին, թէ Սասունեան սպանութիւնը իրականացուցած է` ի նշան վրէժի օսմանեան թուրքերու կողմէ հայերու նկատմամբ գործուած ցեղասպանութեան: 1984 թուականին դատարանը վճռած էր զայն դատապարտել ցմահ բանտարկութեան` առանց պայմանական ազատ արձակման իրաւունքի` ընդգծելով, որ սպանութիւնը իրականացուած է Արըքանի ազգային պատկանելութեան պատճառով:

Սասունեան ի սկզբանէ կը մերժէր հիւպատոսը սպաննելու փաստը եւ միայն սպանութենէն 20 տարի անց` 2002 թուականին ան բանտէն ազատուելու հնարաւորութեան դիմաց խոստովանած է իր դերակատարութիւնը Արըքանի սպանութեան մէջ` նշելով, որ կը կիսէ Արըքանի ընտանիքի կորուստի ցաւը:

Յանցանքը խոստովանելու դիմաց` դատախազները համաձայնեցան անոր մեղադրականէն հանել «սպանութիւնը ազգային հողի վրայ իրականացնելու» դրոյթը, ինչ որ անոր պայմանական ազատ արձակուելու հնարաւորութիւն պիտի ընձեռէր:

Պայմանական ազատ արձակման հարցով դատական լսումները տեղի ունեցան 2006-ին, ապա 2010-ին, սակայն երկու անգամն ալ մերժուեցան: 2016 թուականին ներման դիմումները քննող յանձնախումբը ի վերջոյ առաջարկեց քննարկել անոր ազատ արձակումը` ընդգծելով, որ Համբիկ Սասունեան մանկութեան հոգեկան ցնցում ունեցած է Լիբանանի պատերազմի հետեւանքով, ընդունած է իր յանցանքը, խղճի խայթ զգացած է ու բանտին մէջ մասնակցած է տարբեր դասընթացներու: Սակայն այս անգամ զայն ազատ արձակելու հարցով 2017 թուականին վեթօ կիրառեց Քալիֆորնիոյ նահանգապետ Ճերի Պրաունը:

Ուշագրաւ է, որ Պրաունի միջամտութիւնը յաջորդած էր ԱՄՆ նախագահ Տանըլտ Թրամփի եւ Թուրքիոյ նախագահ Ռեճեփ Թայիփ Էրտողանի հանդիպման:

Թրքական լրատուամիջոցները կը յայտնեն, որ ամերիկաբնակ թուրքերը արդէն նամակներ յղած են ազատ արձակման հարցով խորհուրդին` պահանջելով ազատ չարձակել Սասունեանը:

  • Facebook
  • Twitter
  • Delicious
  • LinkedIn
  • StumbleUpon
  • Add to favorites
  • Email
  • RSS