ՄԱԿ-ի Մէջ Տարածուած է Արցախի Հանրապետութեան ԱԳՆ Փաստաթուղթը

UN

Մայիս 8-ին Միաւորուած ազգերու կազմակերպութեան մէջ (ՄԱԿ) տարածուած է Արցախի Հանրապետութեան արտաքին գործոց նախարարութեան կողմէ պատրաստուած յուշագիրը, որ կը ներկայացնէ ատրպէյճանա-ղարաբաղեան հակամարտութեան կարգաւորման առնչուող հարցերու լայն շրջանակի վերաբերեալ Արցախի Հանրապետութեան դիրքորոշումը:

ԱԳՆ մամլոյ ծառայութեան փոխանցմամբ` Մայիս 18-ին փաստաթուղթը հրապարակուած է ՄԱԿ պաշտօնական կայքէջին մէջ եւ հասանելի է հետեւեալ յղումով`  http://undocs.org/en/A/72/858 :

Փաստաթուղթին մէջ կը ներկայացուի փաստարկներ, որոնք կը ցուցադրեն ատրպէյճանական կողմի ինչպէս պատմական, այնպէս ալ իրաւական  փաստարկներու սնանկութիւնը, որոնք` իրենց ամբողջութեամբ, իւրայատուկ դրսեւորումն են Ատրպէյճանի մտադրութեան` յետագային եւս խոչընդոտել Արցախի ժողովուրդի կողմէ իր անկապտելի իրաւունքի` մարդու անհատական եւ հաւաքական իրաւունքի իրացումը:

Յուշագրի մէջ կ՛ընդգծուի, որ աղաւաղուած կերպով մեկնաբանելով  միջազգային իրաւունքի օրէնքներրը` Ատրպէյճան անյաջող փորձեր կ՛ընէ արդարացնելու Արցախի մեկուսացման եւ ատրպէյճանա-ղարաբաղեան հակամարտութեան խաղաղ կարգաւորումը խոչընդոտելուն ուղղուած իր ապակառուցողական քաղաքականութիւնը: «Տապալելով որեւէ նախաձեռնութիւն, թշնամական կերպով պարտադրելով առճակատման տրամաբանութիւն, փորձելով սանձազերծել նոր պատերազմ` ատրպէյճանական իշխանութիւնները յոյս ունին փոխել ատրպէյճանա-ղարաբաղեան հակամարտութեան կարգաւորման ընթացքը, ուր յստակ կ՛երեւի Արցախի ժողովուրդի` իր ապագան որոշելու վճռական դերակատարութեան աճող ընկալման միտում»:

«Ատրպէյճանա-ղարաբաղեան հակամարտութիւնը, որ սկսած է Արցախի եւ Ատրպէյճանի հայ բնակչութեան իրաւունքներու զանգուածային խախտումներով, կը շարունակուի առ այսօր` նոյն ատրպէյճանական կողմի` Արցախի Հանրապետութեան քաղաքացիներու անհատական եւ հաւաքական իրաւունքները ժխտելու իր քաղաքականութենէն հրաժարելու ցանկութեան բացակայութեան պատճառով: Այս քաղաքականութիւնը, որ կ՛արտայայտուի, մասնաւորապէս, ատրպէյճանական կողմէ շարունակուող ռազմական սադրանքներուն զուգահեռ Արցախը մեկուսացնելուն ուղղուած ջանքերու գործադրմամբ, ոչ միայն Ատրպէյճանի կողմէ իր իսկ միջազգային պարտաւորութիւններու ոտնահարում է, այլեւ լուրջ սպառնալիք` Հարաւային Կովկասի մէջ խաղաղութեան ու անվտանգութեան»,- նշուած է յուշագիրին մէջ:

  • Facebook
  • Twitter
  • Delicious
  • LinkedIn
  • StumbleUpon
  • Add to favorites
  • Email
  • RSS