ՀՀԿ-ն Առայժմ Կը Նախապատրաստուի 2022-ի ԱԺ Ընտրութիւններուն. Վահրամ Բաղդասարեան

vahram-baghdasaryan

Ընտրական օրէնսգիրքի փոփոխութիւններու շուրջ առաջարկներ չունինք, բայց որեւէ քննարկումէ պիտի չհրաժարինք: Այս մասին Ազգային Ժողովի մէջ ճեպազրոյցներու ժամանակ յայտարարեց Հայաստանի Հանրապետական կուսակցութեան խմբակցութեան ղեկավար Վահրամ Բաղդասարեան:

«2017-ի ընտրութիւններէն առաջ մենք մեր բոլոր առաջարկները ներկայացուցած ենք: Ընտրական օրէնսգիրքը ընդունուած է համաձայնութեամբ: Քննարկումները ծաւալած էին տարբեր խողովակներով, եթէ կը յիշէք: Եղան ընտրութիւններ, միջազգային կառոյցները դրական կարծիքներ յայտնեցին, դիտողութիւնները մասնակի էին: Բոլորը երջանիկ էին: Ամէն պարագայի, եթէ հիմա մեզի առաջարկուի քննարկել Ընտրական օրէնսգիրքի փոփոխութիւնը, պատրաստ ենք քննարկելու»,- ըստ “Թերթ”-ի՝ ըսած ՀՀԿ-ական պատգամաւորը:

Հարցումին` հնարաւոր կը համարէ՞ք արտահերթ ընտրութիւնները ունենալ աշնան, ՀՀԿ խմբակցութեան ղեկավարը պատասխանեց. «Այն, ինչ կը վերաբերի Սահմանադրութեան, պատկերացումներով առաջ չեմ շարժուիր, մենք պէտք է յղում կատարենք Սահմանադրութեան:

«Այն ինչ թոյլատրելի է Սահմանադրութեան ծիրէն ներս, առաջ կը շարժինք, եթէ ըլլայ փաստաթուղթ, կ՛ըլլայ քննարկում: Մենք առայժմ կը նախապատրաստուինք 2022-ի ԱԺ ընտրութիւններուն»:

Վահրամ Բաղդասարեան շեշտած է` իրենք պիտի շարժին միայն սահմանադրական ճանապարհով եւ այդ ծիրէն ներս ներկայացուած փաստաթուղթերը պիտի քննարկեն:

Միաժամանակ, ան ըսաւ, որ քաղաքական ներկայ իրողութեան մէջ արտահերթ խորհրդարանական ընտրութիւններ իրականացնելու անհրաժեշտութիւն ինքը չի տեսներ:

«Որեւէ խոչընդոտ պիտի չհանդիսանանք ներկայ կառավարութեան, մենք պէտք է օժանդակենք կառավարութեան` այն ծրագիրներու ներկայացման, որոնք միտուած կ՛ըլլան ապագայի զարգացման: Այլ ճանապարհ պիտի չորդեգրենք: Ի՞նչն է դրդապատճառը, որ պէտք է երթան արտահերթ ընտրութիւններու առաջարկութեամբ: Ի հարկէ, կրնանք քննարկել այդ հարցրերը, երբ շեղում ըլլայ արտաքին քաղաքական շառաւիղէն, վտանգ կը զգանք, այդ ժամանակ կը հրաւիրենք բանակցային սեղանի շուրջ: Իսկ դրական առաջարկները մենք լռակեաց չենք ընդունիր, կը բարձրաձայնենք»,- ընդգծեց Բաղդասարեան:

Դիտարկման, թէ արտահերթ ընտրութիւններու ունենալու համար պատճառ չէ՞ արդեօք այն, որ կառավարութեան մէջ այլ ուժ կ՛իշխէ, խորհրդարանին մէջ` այլ, Հանրապետական պատգամաւորը պատասխանեց. «Իսկ Ապրիլին չէի՞ք մտածեր այն մասին, որ կրնային նման խնդիրներ յառաջանալ: Ատոր համար հարկաւոր էր համբերել եւ 2022-ին սահմանադրական ճանապարհով երթալ իշխանափոխութեան»։

Ան ըսած է, որ իրենք ընդդիմութիւն են կառավարութեան, Ազգային ժողովի մէջ մեծամասնութիւն են` չեն կրնար ընդդիմութիւն ըլլալ։

  • Facebook
  • Twitter
  • Delicious
  • LinkedIn
  • StumbleUpon
  • Add to favorites
  • Email
  • RSS