«Տնջրէ»-ի Համերգը Վերածուեցաւ Ււրօրինակ Ազգային Պարի Փառատօնի (տեսանիւթ)

33398383_1262837490576579_7190916714077356032_n

Ստեփանակերտի մշակոյթի եւ երիտասարդութեան պալատին մէջ, «Տնջրէ» աւանդական երգի ու պարի խումբը, Մայիս 24-ին, «Ձօն քաջաց» խորագիրով, առաջին անգամ, հանդէս եկած է համերգային ծրագիրով՝ նուիրուած Հայաստանի առաջին Հանրապետութեան 100 եւ Արցախեան շարժման 30-ամեակներուն: Այս մասին կը հաղորդէ Artsakhpress.am-ը։

«Տնջրէ» աւանդական  երգի ու պարի խումբը անցած է աւելի քան չորս տարուան ստեղծագործական ուղի: Համերգին ներկայացուած են ազգային երգեր, ռազմական, հարսանեկան, ծիսական եւ այլ տեսակի պարեր: Հանդիսատեսին կողմէ «Տնջրէ» աւանդական երգի ու պարի խումբը ընդունուած է ջերմութեամբ: Համերգը վերածուած է իւրօրինակ ազգային պարի փառատօնի, քանի որ պարած է գրեթէ ողջ դահլիճը:

«Տնջրէ» աւանդական երգի ու պարի խումբի պարուսոյց Մանուկ Յարութիւնեան ըսած է, որ   խումբը ձեւաւորուած է 2013 Նոյեմբեր 24-ին, երբ իրենք՝ Մոնթէ Մելքոնեանի ծննդեան  տարեդարձին նուիրուած ձեռնարկին ժամանակ՝ առաջին անգամ հանդէս եկած են ելոյթով:

Այնուհետեւ, մօտ մէկ տարի շարունակ, խումբ մը պարասէրներով կազմակերպած են բաց դասեր՝ նպատակ ունենալով Արցախի մէջ հանրայնացնել ազգային պարերը: Այդ ժամանակ  պարուսոյցը Ծովինար Աւետիսեանն էր:

2013-ի Սեպտեմբերին, Երեւանէն Արցախ մեկնած է պարուսոյց Սարգիս Պարսամեանը եւ  անոր գլխաւորութեամբ ալ հիմնադրուած է ներկայ խումբը. անդամները սկսած են աւելի աշխոյժ աշխատիլ՝ պարբերաբար կազմակերպելով  բաց դասեր եւ իրականացնելով տարբեր ծրագիրներ:

Բաց դասերուն մասնակցած են հարիւրաւոր երիտասարդներ: Պարուսոյցին խօսքով՝ ատիկա եղած է կարեւոր ձեռքբերում: Սարգիս Պարսամեանի գլխաւորութեամբ՝ խումբը գործած է մինչեւ 2015:

«2017-ի սկիզբը, ԱՀ մշակոյթի, երիտասարդութեան հարցերու եւ զբօսաշրջութեան   նախարարութեան հրաւէրով՝ ես միացայ խումբին եւ մինչեւ հիմա կը շարունակեմ առաքելութիւնս: Սկիզբը անիկա ազգային պարերու խումբ էր, այսօր արդէն՝ աւանդական երգի ու պարի: Խումբի կայացման նպաստեց  նաեւ ժողովրդական երգի մասնագէտ Մարատ Յարութիւնեան: Ներկայիս խումբը կազմուած  է 14 անդամէ. անոնց քանակը յառաջիկայի պիտի համալրուի նոր մասնակիցներով»,- ըսած է  Մ. Յարութիւնեան եւ շեշտած, որ ԱՀ մշակոյթի, երիտասարդութեան հարցերու եւ  զբօսաշրջութեան նախարարութիւնը մեծ աջակցութիւն կը ցուցաբերէ իրենց աշխատանքներուն:

Խումբի անդամ Թամար Սարգսեանի կարծիքով՝ համերգը նպատակ ունեցած է հանրութեան ցոյց տալ, թէ որն է ազգային պարը եւ անիկա որքան ազդեցութիւն կը ձգէ մարդու  ներաշխարհին վրայ:

Ըստ անոր՝ իրենց նպատակը պարը ժողովուրդին մէջ տարածելն է, զայն հանրայնացնելը:

Համերգին ներկայ եղած են Արցախի Հանրապետութեան նախագահի աշխատակազմի ղեկավար Մարատ Մուսայէլեան, ԱՀ մշակոյթի, երիտասարդութեան հարցերու եւ  զբօսաշրջութեան նախարար Սերգէյ Շահուերդեան, պետական այրեր եւ արուեստասէր   հասարակութիւն:

 

 

 

  • Facebook
  • Twitter
  • Delicious
  • LinkedIn
  • StumbleUpon
  • Add to favorites
  • Email
  • RSS