ՀՀ Վարչապետն ու Նախագահը Պիտի Միանան Հարաւային Քալիֆորնիայի Համալսարանի Հայագիտութեան Ուսումնարանի Քննարկման

screenshot_2018_05_18_11.thumb

Հայաստանի վարչապետ Նիկոլ Փաշինեանն ու նախագահ Արմէն Սարգսեանը տեսակապի միջոցով պիտի միանան Հարաւային Քալիֆորնիայի համալսարանի Հայագիտութեան ուսումնարանին մէջ կայանալիք քննարկման՝ «Հայաստանը վաղը․ քաղաքացիական դիւանագիտութիւնը՝ գործողութեան մէջ» խորագիրով։ Այս մասին կը հաղորդէ Civilnet.am-ը։

Մեծ քննարկման պիտի մասնակցին աւելի քան մէկ տասնեակ աւելի գիտնականներ աշխարհի տարբեր երկիրներէ, յայտնի ցուցարարներ (activist) Հայաստանէն։

Մասնակիցները պիտի անդրադառնան բազմաթիւ այն հարցերու, որոնք ծագած են Հայաստանի մէջ ներքաղաքական իրավիճակի փոփոխութենէն, վարչապետի պաշտօնին Նիկոլ Փաշինեանի ընտրուելէն ետք․ «Ի՞նչ փոփոխութիւններ կարելի է եւ պէտք է ընել շատ արագ՝ հասնելու այն վերափոխման, որ խոստացած են բողոքի շարժման առաջնորդները», «Քաղաքականութիւնը ինչպէ՞ս պիտի փոխակերպուի քաղաքականութեան մշակման եւ իրագործման»։

«Այն, ինչ մարդիկ Հայաստանի մէջ եւ անոր սահմաններէն դուրս կ՝անուանեն յեղափոխութիւն, կը թուէր ե՛ւ անհնարին, ե՛ւ անխուսափելի՝ հաշուի առնելով Հայաստանի քաղաքացիական ուսումնարաններու եւ տնտեսութեան անկումային վիճակը»,- նկատած է Հարաւային Քալիֆորնիայի համալսարանի Հայագիտութեան ուսումնարանի տնօրէն Սալբի Ղազարեանը։ Անոր խօսքով՝ ուսումնարանը կը հովանաւորէ կիրակնօրեայ ձեռնարկը՝ օգնելու բոլորին հասկնալ, թէ ինչ տեղի կ՝ունենայ այն երկիրներուն մէջ, որոնք կարճ ժամանակահատուածի մէջ կ՝անցնին նման լայնածաւալ վերափոխման մէջէն։

Քննարկման մասնակիցներէն է յեղափոխութեան առաջնորդներէն, Ազգային անվտանգութեան խորհուրդի նորանշանակ քարտուղար Արմէն Գրիգորեանը, վրաստանեան Վարդերու յեղափոխութեան ժամանակ երկրի խորհրդարանի խօսնակ Դաւիթ Ուսուպաշվիլին, Յորդանանէն փրոֆէսըր Ֆայեզ Համմատը, որ Ուսումնարանին մէջ կը դասաւանդէ Մերձաւոր Արեւելքի քաղաքականութիւն եւ փրոֆէսոր Աննա Օհանեան, որ պիտի խօսի պետականաշինութեան մարտահրաւէրներուն մասին։

Փրոֆէսըր Քեթի Փիրս պիտի անդրադառնաայ բողոքի ցոյցերուն ժամանակ հասարակական լրատուամիջոցներու դերին եւ յետագայ կառավարման, Իրինա Ղափլանեան պիտի խօսի հասարակական-տնտեսական եւ քաղաքական այն պայմաններուն մասին, որոնք յանգեցուցին բողոքի շարժման։

Փաստաբան եւ նախկին դատաւոր Էդուարդ Մուրատեան պիտի անդրադառնայ դատական անյապաղ բարեփոխումներուն, լրագրողներ Էմիլ Սանամեանն ու Գրիգոր Աթանեսեանը՝ տարածաշրջանին մէջ սպասուելիք իրադարձութիւններուն։ Տնտեսագէտներ Տարօն Աճէմօղլուն եւ Պետրոս Թերզեանը պիտի խօսին ուժանիւթի կախուածութիւն ունեցող երկրի տնտեսական մարտահրաւէրներուն մասին, որ կը փորձէ աւազակապետութենէն անցում կատարել բաց խաղադաշտի։

«Հզօր ժամանակներ են Հայաստանի եւ հայերու համար։ Աշխարհը իշխանութեան այս խաղաղ, միեւնոյն ժամանակ, հիմնարար փոփոխութիւնը կը կոչէ բացառիկ։ Հայերը Հայաստանի մէջ եւ անոր սահմաններէն դուրս ոգեւորուած են եւ խանդավառ։ Այդուհանդերձ, դեռ այնքան շատ բան կայ հետազօտելու եւ վերլուծելու, որպէսզի հսկայական այս փոփոխութեան մէջ ներգրաւուիլ ուզողները ատիկա ընեն օգտակար եւ գործնական ճանապարհով»,- ըսած է Սալբի Ղազարեան։

Քննարկումը տեղի պիտի ունենայ Մայիս 20-ին, Հարաւային Քալիֆորնիայի համալսարանի Հայագիտութեան ուսումնարանին մէջ։

 

  • Facebook
  • Twitter
  • Delicious
  • LinkedIn
  • StumbleUpon
  • Add to favorites
  • Email
  • RSS