Առաջին Հանրապետութեան 100-ամեակի Ձեռնարկներ Սպանիոյ Մէջ

1-7

Սպանիոյ Արարատ Հայկական միութեան նախաձեռնութիւնը՝ Հայաստանի առաջին Հանրապետութեան 100-ամեակին նուիրուած՝ բուռն արձագանգ գտաւ արդէն նորածին ժողովրդավար Հայրենիքի ոգեւորութեամբ ներշնչուած վալենսահայութեան ծիրէն ներս։

Այս անգամ միութիւնը հանրութեան ներկայացուց ժողովրդածին Հայրենիքի առաջին աւետաբերներու՝ սիրուած դերասաններ Հայկ եւ Գոհար Սարգսեաններու հեղինակած “Իմ տունը կամ անկախ ամէն ինչէ” կատակերգութիւնը, որուն առանցքային յորդորը Հայրենիքը չլքելն ու զայն աւելի հզօրացնելն է։ Յայտնի դերասանները ժամանած էին Վալենսիա՝ կարեւորագոյն խորհուրդով. Հայաստանը այլեւս ուրիշ է, աւելի բարեկեցիկ, օրինական եւ հիւրընկալ, որ անվերապահօրէն իր դռները բացած է աշխարհասփիւռ հայութեան առջեւ։ Ներկայացման հերոսները՝ երկիրը լքելու ծանր որոշման առջեւ կանգնած ամուսինները, ի վերջոյ կ՝որոշեն չերթալ եւ հոգ տանիլ նորածին թոռնիկին, որ նորահիմք Հայաստանի ապագայ շէնցնողը պիտի ըլլայ։ Սիրուած դերասանները, Հայրենիքի կարօտը սրտերուն մէջ ամբարած վալենսահայ հանդիսատեսը, շատ ջերմօրէն ընդունեց։

Հանդիսատեսներու շարքերուն մէջ կային նաեւ սպանացիներ, ներառեալ՝ Միսլաթայի քաղաքապետարանի Մշակոյթի եւ Արտաքին յարաբերութիւններու խորհրդականներ Պեպի Լուխանն ու Խոսէ Լուիս Կարսիան, որոնք կլանուած կը դիտէին օտարալեզու ներկայացումը ու գրեթէ կը հասկնային պանդխտութեան ուղին իր առջեւ ունեցող հայու հոգին։ Ահա եւս մէկ ձեռնարկ՝ մեր մայիսեան յաղթանակները լուսաբանող, որոնց մեկնարկը տրուած էր արդէն Ապրիլին՝ Ջիւան Միրզոյեանի անհատական ցուցահանդէսով։

Արարատ Հայկական միութիւն Վալենսիա, Սպանիա

  • Facebook
  • Twitter
  • Delicious
  • LinkedIn
  • StumbleUpon
  • Add to favorites
  • Email
  • RSS