ԵԽԽՎ Ատրպէյճանի Կաշառակերութեան Աղմկայարոյց Դէպքին Գործով Պատժամիջոցներ Կիրառած է 4 Պատգամաւորի Նկատմամբ

ԵԽԽՎ

Եւրոխորհուրդի խորհրդարանական վեհաժողովի անկախ յանձնաժողովը, որ հետաքննութիւն կ՛իրականացնէր Ատրպէյճանի կաշառակեր գործունէութեան վերաբերեալ, որոշում կայացուցած է խիստ պատժամիջոցներ կիրառել չորս պատգամաւորներու, որոնց մէջ նաեւ ԵԽԽՎ-ի մէջ ատրպէյճանական պատուիրակութեան ղեկավար Սամետ Սէիտովի նկատմամբ. անոնք զրկուած են ձայնի իրաւունքէ: Ինչպէս կը հաղորդէ «Արմենփրես»-ը, այս մասին կը յայտնեն ուքրանական լրատուամիջոցները:

Սէիտովէն բացի, պատժամիջոցներ կիրառուած են նաեւ ԵԽԽՎ նախկին նախագահ Փետրօ Ագրամունտի (Սպանիա), Ուքրանիոյ հարցով նախկին զեկուցող Ժորտի Շուքլայի (Սպանիա) եւ Սեզար Փրետայի (Ռումանիա) դէմ: Այս մասին որոշումը ֆէյսպուքեան իր էջին մէջ հրապարակած է ԵԽԽՎ-ի մէջ Ուքրանիոյ պատուիրակութեան ղեկավար Վլատիմիր Արիեւը:

«ԵԽԽՎ յանձնաժողովը ճանչցած է, որ Փետրօ Ակրամունթը եւ Ժորտի Շուքլան մեղաւոր են վարքագծի կանոնները լրջագոյնս խախտելու մէջ` Ատրպէյճանի հետ կապուած կաշառակերութեան աղմկայարոյց դէպքին առնչութեամբ»,- յայտնած է Արիեւը: Ան տեղեկացուցած է նաեւ, որ նշուած պատգամաւորները կորսնցուցած են ԵԽԽՎ անդամի գրեթէ բոլոր իրաւունքները` բացառութեամբ քուէարկելէ եւ բանաձեւեր ներկայացնելէ:

ԵԽԽՎ-ի մէջ Ուքրանիոյ պատուիրակութեան անդամ Ալեքսէյ Կոնչարենքոն յայտնած է, որ պատժամիջոցները Ակրամունթի դէմ պիտի գործեն 10, իսկ միւս երեք պատգամաւորներուն դէմ` 2-ական տարիով:

Կ՛ակնկալուի, որ ԵԽԽՎ-ն հանդէս գայ պաշտօնական յայտարարութեամբ:

Եւրոպայի խորհուրդը 2017 թուականէն սկսեալ հետաքննութիւն սկսած է` կապուած Ատրպէյճանի մասնակցութեամբ Եւրոխորհուրդի խորհրդարանական վեհաժողովի մէջ կաշառակերութեան աղմկայարոյց դէպքին հետ: ԵԽԽՎ խումբ մը պաշտօնեաներ կը մեղադրուին կաշառքի դիմաց Ատրպէյճանի օգտին որոշումներ կայացնելուն մէջ:

Մասնաւորապէս, կան կասկածներ, որ Ատրպէյճան 2013-ին մեծապէս ազդած է ԵԽԽՎ որոշումին վրայ. այդ ժամանակ կառոյցը քուէարկութեան արդիւնքով մերժած էր գերմանացի պատգամաւոր Քրիսթոֆ Շթրասէրի կողմէ ներկայացուած զեկոյցը, որ կը վերաբերէր Ատրպէյճանի մէջ մարդու իրաւունքներու ոտնահարումներուն ու կոչ կ՛ընէր այդ երկրի իշխանութիւններուն ազատ արձակելու քաղբանտարկեալները: Համաձայն շրջանառուող լուրերու` ԵԽԽՎ անդամներէն մէկուն` Լուքա Վոլոնթէին վճարուած է աւելի քան 2.5 միլիոն տոլար, որպէսզի զեկոյցը չընդունուի: Ատրպէյճան հերքած է ներկայացուած բոլոր մեղադրանքները:

  • Facebook
  • Twitter
  • Delicious
  • LinkedIn
  • StumbleUpon
  • Add to favorites
  • Email
  • RSS