Պաշտօնապէս Բացուեցաւ Հարասթա Շրջանի Դամասկոս-Հոմս Միջազգային Մայր Ճամբան

32474118_1423829974385691_6403533244603564032_n

Երեքշաբթի, Մայիս 15-ին, Դամասկոս հիւսիսային մուտքի ճամբուն վերանորոգութենէն ետք, պաշտօնապէս բացուեցաւ եւ բանուկ դարձաւ Դամասկոս-Հոմս միջազգային մայր ճամբան։

Ըստ «Գանձասար»-ի՝ Սուրիոյ փոխադրութեան նախարար երկրչփ. Ալի Համմուտ բացման առիթով յայտնեց, որ երկրաչափական միաւորներ, զինեալ ահաբեկչական խմբաւորումներուն արեւելեան Ղութայէն դուրս ելլելէն անմիջապէս ետք, սկսան ճամբուն նորոգութեան եւ երթեւեկութեան վերականգնումի աշխատանքները, ինչպէս՝ ճամբուն ականազերծումը, կուպրապատումը, ելեկտրական ցանցերու եւ երթեւեկութեան ապահովութեան համար նախատեսուած ցուցանակներու վերահաստատումը եւ այլն։

Վարորդներէն ոմանք յայտնեցին, որ այս ճամբուն վերականգնումով Դամասկոս-Հոմս երթեւեկութեան ժամանակն ու ծախսը նկատելի ձեւով նուազեցան։

Յիշենք, որ Դամասկոս-Հոմս միջազգային մայր ճամբուն վերանորոգումը սկսած էր Ապրիլ ամսուն, զինեալ ահաբեկիչներուն Հարասթայի շրջանէն եւ ընդհանրապէս արեւելեան Ղութայէն դուրս ելլելէն ետք։

Յիշեալ միջազգային մայր ճամբան փակ կը մնար 2013-էն ի վեր, զինեալ ահաբեկչական խմբաւորումներուն Հարասթա ներխուժման եւ երթեւեկող փոխադրամիջոցներն ու ճամբորդները դիպուկահարներու թիրախ դարձնելուն հետեւանքով։

  • Facebook
  • Twitter
  • Delicious
  • LinkedIn
  • StumbleUpon
  • Add to favorites
  • Email
  • RSS