Թանգարաններու Գիշերը Հայոց Ցեղասպանութեան Թանգարանի Այցելուները Կրնան Բացառիկ Ցուցանմուշներ Տեսնել

86506

Նախորդ տարիներուն նման, այս տարի նոյնպէս, Հայոց Ցեղասպանութեան թանգարանը պիտի միանայ միջազգային «Թանգարաններու գիշեր-2018» ծրագիրին: Մայիս 19-ին, թանգարանը բաց պիտի մնայ մինչեւ երեկոյեան ժամը 19:00:

Հիմնական ցուցադրութենէն բացի՝ այցելուները հնարաւորութիւն պիտի ունենան ծանօթանալու, Ապրիլ 20-ին, Հայոց Ցեղասպանութեան ժամանակաւոր ցուցադրութիւններու սրահին մէջ բացուած Հայաստանի առաջին հանրապետութեան 100-ամեակին նուիրուած ցուցադրութեան:

«Հանրապետութեան ծնունդը» խորագիրը կրող ցուցադրութիւնը կ՝ընդգրկէ Հայաստանի առաջին հանրապետութեան առնչուող եզակի ցուցանմուշներ Հայաստանի եւ Սփիւռքի շարք մը թանգարաններէ եւ անձնական հաւաքածուներէ:

Ցուցադրութեան մէջ ներառուած հազուագիւտ ցուցանմուշներուն մէջ են պաստառներ, յուշամետալներ, յոբելինական բացիկներ, եզակի հրատարակութիւններ, պատմական լուսանկարներ եւ այլն: Ներկայացուած են Սարդարապատի մէջ յայտնաբերուած թրքական դրօշի ծայրակալ, հայկական բանակին եւ պետական խորհրդանշաններուն առնչուող բացառիկ ցուցանմուշներ եւ այլն:

Ժամանակաւոր ցուցադրութեան մէջ ընդգրկուած են նաեւ ՀՑԹՀ-ին (Հայոց Ցեղասպանութեան թանգարան-հիմնարկ) կողմէ վերջին մէկ տարուան ընթացքին ձեռք բերուած նորայայտ ցուցանմուշները, որոնց շարքին բացառիկ նշանակութիւն ունին բոլորովին վերջերս յայտնաբերուած Մուսա Լերան հերոսամարտի մասնակիցներու տարհանման գործողութիւնը ներկայացնող ապակեայ negative-ները, որոնք Հայոց Ցեղասպանութեան թանգարանին յանձնած է ֆրանսական նաւատորմի «Գիշեն» յածանաւի ռազմածովային սպայ Լիւսիէն Պոժէի թոռնուհին՝ Ան Սուբան:

Ցուցադրութիւնը պիտի գործէ մինչեւ Յունիս 5:

  • Facebook
  • Twitter
  • Delicious
  • LinkedIn
  • StumbleUpon
  • Add to favorites
  • Email
  • RSS