«Բարգաւաճ Հայաստան»ը Խստօրէն կը Դատապարտէ Խաղաղ Ցուցարարներուն Նկատմամբ Բռնի Ուժի Կիրառումը

Akcia-22-

Հայաստանի Հանրապետութեան մէջ ստեղծուած իրավիճակը պայթունավտանգ է։ Մեր երկիրը այսօր կանգնած է պետականութեան սպառնացող լրջագոյն վտանգի առջեւ, որ կը մեծնայ իւրաքանչիւր ժամի հետ։

Ապրիլ 22-ի առաւօտեան ԱԺ պատգամաւորներ Նիկոլ Փաշինեանի, Սասուն Միքաելեանի եւ Արարատ Միրզոյեանի ձերբակալութիւնը, խաղաղ երթի ընթացքին, ա՛լ աւելի բորբոքած է հանրային դժգոհութեան ալիքը:

Ըստ newstime.am-ի՝ «Բարգաւաճ Հայաստան» կուսակցութիւնը խստօրէն կը դատապարտէ խաղաղ ցուցարարներուն նկատմամբ բռնի ուժի կիրառումը, ինչպէս նաեւ բողոքի շարժման առաջնորդներուն եւ մասնակիցներուն՝ իրաւական տեսակէտէ խոցելի հիմնաւորումով ձերբակալութիւնները։

Մենք կոչ կ՝ընենք անյապաղ ազատ արձակել ԱԺ պատգամաւորները՝ ատով իսկ փորձելով խուսափիլ հնարաւոր անդառնալի զարգացումներէն եւ հետեւանքներէն:

«Բարգաւաճ Հայաստան» կուսակցութիւնը մէկ անգամ եւս կը վերահաստատէ իր դիրքորոշումը առ այն, որ ստեղծուած իրավիճակը պէտք է յանգուցալուծուի բացառապէս խաղաղ ու բացառապէս քաղաքական ճանապարհով։

Մենք անթոյլատրելի կը համարենք ինչպէս ուժային մեթոտները, այնպէս ալ՝ վերջնագիրները, որոնք ստեղծուած իրավիճակը կը դարձնեն փակուղային։

«Բարգաւաճ Հայաստան» կուսակցութիւնը՝ իբրեւ Հայաստանի Հանրապետութեան խորհրդարանի մեծութեամբ երկրորդ քաղաքական ուժ, իշխանութեան ու «Իմ քայլը» նախաձեռնութեան կոչ կ՝ընէ նստելու բանակցութիւններու սեղանի շուրջ՝ անգամ առանց ատոր օրակարգի նախնական համաձայնութեան։

Այսօր Հայաստանի Հանրապետութեան մէջ կայ մէկ օրակարգային հարց, եւ ատիկա ստեղծուած իրավիճակը խաղաղ յանգուցալուծելու եւ որեւէ բախում բացառելու հարցն է։ «Բարգաւաճ Հայաստան» կուսակցութիւնը պատրաստ է իր քաղաքական եւ հանրային գործիքակազմի միջոցով նպաստելու այդ գործընթացի կայացման։

Հայաստանի Հանրապետութեան պետականութիւնը աւելի արժէքաւոր է որեւէ քաղաքական նպատակէ եւ շահէ։ Հայաստանի Հանրապետութեան պետականութիւնը բացարձակ ու անբեկանելի արժէք է, որ պահպանելու սրբազան պարտք ունինք բոլորս։

  • Facebook
  • Twitter
  • Delicious
  • LinkedIn
  • StumbleUpon
  • Add to favorites
  • Email
  • RSS