Բակօ Սահակեան Կոչ Ըրած է Վիճայարոյց Հարցերը Կարգաւորել Երկխօսութեան Միջոցով

36.thumb

Արցախի Հանրապետութեան նախագահ Բակօ Սահակեանը յայտարարութիւն տարածած է Հայաստանի ներքաղաքական իրավիճակի առնչութեամբ: Այս մասին կը յայտնէ Արցախի Հանրապետութեան նախագահի աշխատակազմի տեղեկատւութեան գլխաւոր վարչութիւնը, նախագահի յայտարարութեան մէջ ըսուած է.

«Այս օրերուն համայն հայութեան ուշադրութիւնը սեւեռուած է Երեւանի եւ Հայաստանի Հանրապետութեան շարք մը քաղաքներու մէջ տեղի ունեցող իրադարձութիւններու վրայ: Արցախը չի կրնար անտարբեր մնալ Մայր Հայաստանի մէջ ընթացող զարգացումներու նկատմամբ եւ նոյնպէս կը հետեւի այդ ամէնուն:

Հայրենիք, որ կը գտնուի բարդ աշխարհաքաղաքական իրավիճակի մէջ, եւ որուն ամէն վայրկեան սպառնայ նենգ թշնամին, ապակայունացման, ներքին համախմբուածութեան խարխլման որեւէ փորձ վտանգաւոր է իրեն համար եւ յղի է վատագոյն հետեւանքներով, ինչը չի կրնար չազդել անվտանգութեան, պաշտպանունակութեան եւ սահմաններու մէջ տիրող իրավիճակի վրայ:

Հայաստանի Հանրապետութեան իւրաքանչիւր քաղաքացի իրաւունք ունի իր կարծիքն ու տեսլականը ներկայացնելու երկրի ներկայի եւ ապագայի վերաբերեալ: Անիկա անքակտելի իրաւունք է, որ ամրագրուած է Սահմանադրութեամբ:

Սակայն, այդ իրաւունքը պէտք է իրականացուի բացառապէս օրէնքի սահմաններէն ներս՝ երբեւիցէ չմոռնալով, որ հայկական երկու պետութիւններու անվտանգութեան երաշխաւորման կարեւորագոյն գործօնը եղած է եւ կը մնայ մեր ներքին կայունութիւնը:

Սիրելի՛ Հայրենակիցներ,

Կոչ կ’ընեմ բոլորիդ՝ անվերապահօրէն հետեւիլ օրէնքի տառին ու ոգիին, վիճայարոյց հարցերը կարգաւորել երկխօսութեան միջոցով, ցուցաբերել զսպուածութեան եւ պատասխանատուութեան բարձր աստիճան:

Մենք պէտք է թոյլ չտանք այնպիսի սխալներ, որոնց հետեւանքները կրնան ճակատագրական ըլալ մեր ժողովուրդի եւ հայոց ազատ ու անկախ պետականութեան համար, որ թանկ ու գերագոյն արժէք է իւրաքանչիւր հայու համար՝ Հայաստանի, Արցախի եւ Սփիւռքի մէջ»:

  • Facebook
  • Twitter
  • Delicious
  • LinkedIn
  • StumbleUpon
  • Add to favorites
  • Email
  • RSS