Թրքական Ազգայնական Լրատուամիջոցին Անդրադարձը Հայկական Եկեղեցիին (լուսանկարներ)

sivrihisar-ermeni kilisesi

Թրքական «Yeni Akit» ազգայնական թերթի կայքը անդրադարձած է Թուրքիոյ Էսքիշեհիր նահանգի Սիվրիհիսար շրջանին մէջ գտնուող հայկական Սբ. Երրորդութիւն եկեղեցւոյ թեմային: Թուրքիոյ մշակոյթի նախարարութեան կողմէ վերջերս վերանորոգուած եկեղեցին կը նախատեսուի օգտագործել մշակութային ձեռնարկներու համար:

Աղբիւրը, նկարագրելով եկեղեցւոյ ընդհանուր տեսքը, կը գրէ, որ անիկա դուրսէն արեւելք-արեւմուտք երկարող ուղղանկիւնաձեւ, ներսէն եռանաւ եկեղեցի է:

«Երկու զանգակատուն ունեցող եկեղեցւոյ մուտքի դրան վերեւը 2 սուրբեր պատկերուած են, որոնց ներքեւը գտնուող արձանագրութեան կողքին ալ հրեշտակի պատկեր կայ: Երեւցող ու չերեւցող որմնանկարներով զարդարուած եկեղեցւոյ հիւսիսային կողմը մկրտութեան սենեակ կայ, իսկ հարաւային մասը` հոգեւորականի սենեակ:

Եկեղեցւոյ ճակատային մասի պատուհաններէն իւրաքանչիւրին վրայ 1881 թիւը խորապատկերուած է: Եկեղեցւոյ գլխաւոր մուտքին երկյարկանի հատուած  մը կայ: Հաւանաբար ատոր 2-րդ յարկը երգչախումբի համար եղած է, իսկ 1-ին յարկի մէկ կողմը համայնքի հաւատացեալ կանայք նստած են, միւս կողմի վրայ` տղամարդիկ»,- «Էրմէնիհապեր»-ի փոխանցմամբ՝ կը գրէ թրքական կայքը:

Աղբիւրին տեղեկութեամբ` 1853-1856 թուականներուն Ղրիմի պատերազմի ընթացքին Օսմանեան Ապտուլ Մէճիտ սուլթանը Սիվիրհիսարի մէջ մեծ թիւով հայեր կը բնակեցնէ: «Այդ ընթացքին Սիվիրհիսարի մէջ մօտ 4500 հայեր կը բնակեցուին: Սակայն դատելով այստեղ գտնուած 1830-ականներուն թուագրուող գերեզմանաքարերու առկայութենէն` Սիվիրհիսարի մէջ ատկէ առաջ ալ հայեր ապրած են: Հայերը այստեղ ապրած են մինչեւ 1916 թուականը: Անոնց տուները եղած են սարի երկու փէշերուն վրայ»,- կ՛աւելցնէ աղբիւրը:

Տեղեկացնենք, որ վերանորոգման ընթացքին Թուրքիոյ մշակոյթի նախարարութիւնը եկեղեցիի տարածքին շուրջ հինգ տասնեակ թուրք գործիչներու արձաններէ բաղկացած «Արձաններու պուրակ» հիմնած է: Տեղադրուած են այնպիսի հայտեաց պատմական դէմքերու արձաններ, ինչպէս՝ Մուստաֆա Քեմալ Աթաթուրքը ու Քեազիմ Քարապեքիրը: Կան նաեւ մշակութային գործիչներու արձաններ` բանաստեղծ Եաշար Քեմալ, նկարիչ Ապիտին Տինօ եւ այլք:

Սիվրիհիսարի Սբ. Երրորդութիւն հայկական եկեղեցին կառուցուած է 1650-ին: 1876 թուականին հրդեհէ լրջօրէն վնասուած է: Վերակառուցուած է 1881 թուին: Թրքական պետութեան կողմէ եկեղեցւոյ վերականգնումը սկսած էր 2010-ին, երբ Սիվրիհիսարի շրջկեդրոնի սեփականութիւնը համարուող եկեղեցին յանձնուած էր մշակոյթի նախարարութեան:


  • Facebook
  • Twitter
  • Delicious
  • LinkedIn
  • StumbleUpon
  • Add to favorites
  • Email
  • RSS