Ուսուցչաց Տօնը Հալէպի Ազգային Վարժարաններէն Ներս

29389386_1374338612668161_8770052614814570621_n

Հովանաւորութեամբ Բերիոյ Հայոց Թեմի Առաջնորդ Գերշ. Տ.Շահան Սրբ. Արք. Սարգիսեանի եւ Ազգ. Վարչութեան, նախաձեռնութեամբ թեմի Ուսումնական Խորհուրդին, 15 Մարտ 2018-ին «Անի» ճաշասրահէն ներս յիշատակուեցաւ Ուսուցչաց տօնը Հալէպի ազգային երեք դպրոցներու՝ Ազգ. Միացեալ Մանկապարտէզի, Նախակրթարանի եւ Քարէն Եփփէ Ազգ. Ճեմարանի ուսուցիչներուն մասնակցութեամբ:

Հաւաքոյթը սկսաւ սրբազան հօր օրհնութեամբ, որմէ ետք Սիլվա Ճապաղջուրեան իր բացման խօսքով անդրադարձաւ հայ դպրոցի առաքելութեան՝ դպրոցը համարելով հայ եկեղեցւոյ եւ հայկական միութեան կողքին ազգային դիմագիծն ու հայկական գոյերթը պահելու հիմնական կռուան: «Հայ դպրոցը դարբնոցն է, ուրկէ հասակ պիտի առնէ նորահաս սերունդը ու պիտի ստանայ ազգային եւ քրիստոնէական դաստիարակութիւն՝ իր ստացած գիտելիքներուն կողքին», ըսաւ Ճապաղջուրեան՝ ապա հրաւիրեց սրբազան հայրը, դպրոցներու տնօրէնները, խնամակալութեան ու հոգաբարձութեան ատենապետները միասնաբար հատելու Ուսուցչաց Տօնին յատուկ թռչնագիր հայերէնով «Տօնդ շնորհաւոր, սիրելի ուսուցիչ» նախադասութեամբ զարդարուած կարկանդակը:


Մտերմիկ ու ջերմ մթնոլորտի մէջ կարգ մը ուսուցիչներ իրենց սրտի խօսքը արտասանեցին: 
Ազգային Միացեալ նախակրթարանի տնօրէնուհի Զեփիւռ Է. Րէիսեան, անդրադառնալով դաստիարակին, մանաւանդ հայ ուսուցիչին ծանր յանձնառութեան, ըսաւ. «Հալէպի մէջ հայ ուսուցիչ ըլլալը մեր պարտաւորութիւնը եռապատկած է, որովհետեւ այսօր Հալէպի շէնքերու վերաշինութեան կողքին մեր ուսերուն դրուած է հայ աշակերտին հոգեկան ու մտային կերտման աշխատանքը»:


Խօսք առաւ ՔԵԱ Ճեմարանի տնօրէն Վահէ Ղազարեան: Ան շեշտեց, թէ դպրոցական բոլոր փուլերը մարդակերտումի առանձնայատուկ դեր ունին: Մանկապարտէզը նոյնքան կարեւորութիւն ունի որքան նախակրթարանն ու երկրորդականը, ուր մանուկին աճումը կը շարունակուի եւ դաստիարակութիւնը կը շաղախուի անոր ազգային դիմագիծի կերտման նուիրուած աշխատանքին:


Սրբազան հայրը շնորհաւորեց ուսուցիչները ըսելով. «Ուսուցիչները իրենց շունչը, ոգին, մտքի պայծառութիւնը եւ ամբողջ ուժականութիւնը ի սպաս կը դնեն աշակերտին, որպէսզի սերունդ կերտեն, նոր որակ հասցնեն մեր համայնքին»:

Ընտանեկան սիրով պատուած մթնոլորտի աւարտին, ներկաներուն բաժնուեցան կարմիր վարդեր, որպէսզի սէրն ու ջերմութիւնը միշտ վառ մնան եւ ուսուցիչներուն միջոցով ցոլան մեր շրջապատին մէջ:


18 Մարտ 2018-ին Ս.Գրիգոր Լուսաւորիչ եկեղեցւոյ մէջ սուրբ եւ անմահ պատարագի աւարտին տեղի ունեցաւ հոգեհանգստեան պաշտօն ննջեցեալ ուսուցիչներու հոգիներուն: Այն նուիրեալներուն, որոնց շնորհիւ ու անոնց դաստիարակութեան արդիւնքով է որ ներկայիս կը վայելենք գիտակից եւ աշխատունակ սերունդներուն ներկայութիւնը մեր իրականութեան մէջ:

Սեւանայ Հալլաճեան

  • Facebook
  • Twitter
  • Delicious
  • LinkedIn
  • StumbleUpon
  • Add to favorites
  • Email
  • RSS