Բակօ Սահակեան Անթիլիասի Մէջ Մասնակցած է ՀՀ Անկախութեան 100-ամեակի Համաժողովի Բացման

82837

Արցախի Հանրապետութեան նախագահ Բակօ Սահակեան, Մարտ 21-ին, Անթիլիասի մէջ մասնակցած0 է Հայաստանի Հանրապետութեան անկախութեան 100-ամեակին նուիրուած համաժողովի բացման հանդիսաւոր արարողութեան եւ հանդէս եկած ողջոյնի խօսքով: Այս մասին կը տեղեկացնեն Արցախի Հանրապետութեան նախագահի աշխատակազմի տեղեկատւութեան գլխաւոր վարչութենէն:

Նախագահը նշած է, որ 1918 թուականը մեր ժողովուրդի պատմութեան ամենաբեկումնային ժամանակահատուածներէն էր, երբ հայ ժողովուրդը վերականգնեց դարեր առաջ կորսնցուցած իր ազգային պետականութիւնը:

«Անկախ պետականութեան վերականգնումը սոսկ հռչակագիր չէր: Անիկա օտարի կողմէ սկուտեղի վրայ մեզի մատուցուած պարգեւ չէր: Կործանման եզրին կանգնած ժողովուրդ մը, որ ընդամէնը երեք տարի առաջ ենթարկուեցաւ ցեղասպանութեան եւ սպանդի, իր մէջ ո՛չ միայն ուժ գտաւ տէր կանգնելու սեփական ճակատագիրին ու երկրին, այլ նաեւ վճռորոշ ճակատամարտերու մէջ ջախջախեց ցեղասպան թշնամին: Նման զարգացումները եւ յաղթանակները առ այսօր ոմանց համար անհաւատալի եւ առեղծուածային կը թուին: Ոմանց, բայց ո՛չ մեզի, ո՛չ մեր ժողովուրդին համար: Այսպիսի սխրանքի գաղտնիքը Աստուծոյ եւ իր սեփական ուժերու հանդէպ մեր ժողովուրդի անկոտրում հաւատքին մէջ է, հարազատ հողի հետ մէկ ամբողջութիւն ըլլալու, անսպառ լաւատեսութեան եւ անձնուիրութեան մէջ»,- ընդգծած է Արցախի Հանրապետութեան նախագահը:

Բակօ Սահակեան շեշտած է, որ 1918 թուականի սխրագործութիւնները եւ դարակազմիկ յաղթանակները մեր ժողովուրդին համար տասնամեակներ ի վեր եղած են ներշնչման եւ ոգեւորութեան իւրայատուկ աղբիւր: «Դժուար է գերագնահատել այն լիցքը, որ անոնք հաղորդեցին մեր ժողովուրդին Երկրորդ աշխարհամարտի տարբեր ճակատներու վրայ եւ Արցախեան ազատամարտի տարիներուն: Հիմա ալ անոնք, սփիւռքի եւ հայրենիքի մէջ մեր ժողովուրդի ազգային հպարտութեան ու կենսունակութեան կարեւոր բաղադրամաս կը հանդիսանան»,- նշած է նախագահը:

Իր ելոյթին աւարտին՝ նախագահ Սահակեան ընդգծած է, որ Արցախը կանգնած է ամուր եւ հաստատակամ` Մայր Հայաստանի ու Սփիւռքի հետ միասին մաքառելու յանուն հայոց անկախ պետականութեան յետագայ զարգացման ու զօրացման, Հայրենիք-Սփիւռք կապերու ամրապնդման, յանուն պայծառ եւ յուսալի ապագայի: «Այս է մեր հերոսամարտերուն խորհուրդը, եւ բոլորս պարտաւոր ենք հնարաւորը ընելու այս ուղղութեամբ»,- եզրափակած է Բակօ Սահակեան:

Համաժողովին կը մասնակցին Մեծի Տանն Կիլիկիոյ Կաթողիկոս Արամ Առաջինը, Հայաստանի, Արցախի, Սփիւռքի եւ տարբեր երկիրներու գիտական, քաղաքական եւ հասարակական շրջանակներու ներկայացուցիչներ:

  • Facebook
  • Twitter
  • Delicious
  • LinkedIn
  • StumbleUpon
  • Add to favorites
  • Email
  • RSS