Հայաստանի Մէջ Մինչեւ Հիմա Շուրջ 40 Հազար Գանձ Կայ. Ֆրանսական TV5 Monde

khachkar

Խաչքարերը պէտք չէ կրկնուին, կ՛ըսէ վարպետը եւ Աստուծմէ ուժ ու գեղարուեստական շնորհ կը խնդրէ` հազար անկրկնելի խաչքարերու համար:

 Հայաստանի մէջ մինչեւ հիմա կան շուրջ 40 հազար մշակոյթային գանձեր` խաչքարեր, կը պատմէ ֆրանսական TV5 Monde հեռատեսիլային կայանը Հայաստանի մէջ խաչքար պատրաստելու արուեստին նուիրուած իր տեսանիւթին մէջ:

«Խաչքարերը միշտ գտնուած են եկեղեցիներու մօտ, գերեզմանատուներու մէջ, վանքերու պատերուն եւ կամուրջներու եզրապատերուն: Որպէս կանոն` ատոնք ուղղուած են արեւմուտք:

Ատոնք պատրաստած են` ի յիշատակ մահացածներու, ռազմական յաղթանակի կամ պատմական իրադարձութեան: Ատոնք յարգանք կ՛արտայայտեն խաչի նկատմամբ, որ քրիստոնէական հաւատքի ու հայկական ինքնութեան պահպանման խորհրդանիշն է», – armeniasputnik- ի փոխանցմամբ՝ կը պատմէ տեսանիւթին հեղինակը:

Թղթակիցները այցելած են քանի մը եկեղեցիներ եւ Վանաձոր քաղաքի արհեստանոցներէն մէկը:

«Քաղաքը եղած է Հայաստանի քիմիական արդիւնաբերութեան կեդրոններէն մէկը: Խորհրդային Միութեան անկումէն ետք գործարանները փակուած են: Անոնց պատերու կմախքները կ՛երեւին կանաչ բնապատկերի` Փամբակ գետի կիրճին մէջ:

Քաղաքի արուեստանոցներէն մէկուն մէջ հին մշակոյթը կը վերածնէ Սերգէյ Դանիէլեանը` տեղի գեղարուեստական ուսումնարանի շրջանաւարտը: «Ես արդէն հինգ հարիւր խաչքար պատրաստած եմ, եւ ոչ մէկը միւսին նման է: Ես կը հաւատամ, Աստուած ինծի ուժ տուած է ստեղծելու հազարը», — կ՛ըսէ վարպետը:

1972-ին ան եղած է այն քիչերէն, որոնք Հայաստանի մէջ զբաղած են խաչքարագործութեամբ: Այդ տասնամեակներու ընթացքին շատ սաներ դաստիարակած է: Հիմա ան գոհ է. Հայաստանի մէջ լաւ վարպետները շատ են:

  • Facebook
  • Twitter
  • Delicious
  • LinkedIn
  • StumbleUpon
  • Add to favorites
  • Email
  • RSS