Հայկական Կօշիկը կը Ներկայացուի Մոսկուայի Միջազգային Ցուցահանդէսին

10899896-300x162

Հայ արտադրողները մոսկովեան միջազգային ցուցահանդէսին կը ներկայացնեն իրենց արտադրանքը եւ գործարար կապեր հաստատելու հնարաւորութիւն կ’ունենան:

Հայաստանի զարգացման հիմնադրամի աջակցութեամբ՝ մեր երկրի 8 ձեռնարկութիւն աշխարհի աւելի քան 1000 ապրանքանիշներու շարքին, Մարտ 13-16, Մոսկուայի մէջ կը մասնակցի «Mosshoes 2018» կօշիկի եւ կաշիէ զարդերու մասնագիտացած ցուցահանդէսին: Այս մասին կը յայտնէ հիմնադրամի մամուլի ծառայութիւնը:

«Mosshoes» միջազգային ցուցահանդէս, այս տարի, 75-րդ անգամ համախմբած է արտադրողներ աշխարհի 30 երկրէ, կը սպասուի աւելի քան 15 000 միջին եւ խոշոր գնորդներու, մատակարարներու այցելութիւն:

Միասնական տաղաւարի մէջ հայկական ընկերութիւնները միջազգային գնորդներուն կը ներկայացնեն բնական եւ փոխարինող կաշիէ կօշիկներ, պայուսակներ, զարդեր եւ այլ արտադրատեսակներ:

Նախորդ տարի գարնան եւ աշնան կայացած «Mosshoes» ցուցահանդէսներուն իբրեւ արդիւնք՝ հայկական 18 ընկերութիւն կնքած է շուրջ 682 միլիոն դրամի արտահանման պայմանագիր:

««Mosshoes»-ը Ռուսաստանի եւ Արեւելեան Եւրոպայի կաշիէ իրերու խոշորագոյն ցուցահանդէսներէն է: Չորս օր, հայ արտադրողները հնարաւորութիւն ունին ներկայացնելու, բանակցելու տասնեակ մատակարարներու հետ, պայմանագիրներ կնքելու, գործարար կապեր հաստատելու, հետեւելու միջազգային միտումներուն եւ, իբրեւ արդիւնք, աւելցնելու արտահանման ծաւալները»,- նշած է ՀԶՀ Միջազգային համագործակցութեան խումբի ղեկավար Նարեկ Ալեքսանեան:

Ցուցահանդէսին այս տարի ներկայացուած են «Սիմոնա», «Բաբիննի», «Կ&Կ շուզ», «Էլկաէռ», «Լունա», «Էլմա», «Կրիստի» եւ «Բեբետա» ապրանքանիշները:

Հայաստանի զարգացման հիմնադրամը միջազգային ցուցահանդէսին հայկական ընկերութիւններու մասնակցութեան աջակցած է արտահանման խթանման ՀՀ կառավարութեան քաղաքականութեան ծիրին մէջ:

 

  • Facebook
  • Twitter
  • Delicious
  • LinkedIn
  • StumbleUpon
  • Add to favorites
  • Email
  • RSS