Կարօ Փայլանը Տրապիզոնի Եկեղեցւոյ Վրայ Յարձակման Հարցով ՆԳ Նախարարին Դիմած է

garo-paylan

Թուրքիոյ քրտամէտ Ժողովուրդներու դեմոկրատական կուսակցութեան հայ պատգամաւոր Կարօ Փայլանը, Մարտ 6-ին Տրապիզոնի Սանթա Մարիա կաթոլիկ եկեղեցւոյ վրայ իրականացուած յարձակման առնչութեամբ, հարցում յղած է երկրի ներքին գործոց նախարար Սուլէյման Սոյլուին: Ըստ Armenpress.am-ի՝ այս մասին յայտնած է Bianet.org-ը:

Փայլանը նախարարին ներկայացուցած դիմումին մէջ անդրադարձած է նախորդ տարիներուն եկեղեցւոյ վրայ իրականացուած յարձակումներուն: Մասնաւորապէս, ան յիշեցուցած է, որ դեռ 2006-ին սպաննուած էր Սանթա Մարիա եկեղեցւոյ կաթոլիկ քահանայ Անտրէա Սանթորոն: Արդէն 2011 Յունուարին, եկեղեցին սպառնալիքներ ստացած էր, որովհետեւ անոր գմբէթին դրուած խաչը կը լուսաւորուի: Եկեղեցւոյ վրայ նետուած էին շիշեր, որոնցմէ մէկուն մէջ եղած էր գրութիւն. «եկեղեցւոյ գլխու խաչը կա՛մ դուք իջեցուցէք, կա՛մ մենք պիտի իջեցնենք»: Այլ յարձակում մը եղած էր նաեւ 2016 Յուլիս 15-ի ռազմական յեղաշրջման փորձէն ետք: Խումբ մը անձեր քարեր նետած էին եկեղեցւոյ վրայ` կոտրելով ապակիները, փորձած էին ջարդել դուռը:

«2006-էն ի վեր տեղի ունեցած իրադարձութիւնները ցոյց կու տան, որ եկեղեցւոյ վրայ համակարգուած յարձակումները կը շարունակուին»,- նշած է Փայլանը:

Ան հետաքրքրուած է նախարարէն, թէ արդեօք այդ յարձակումներուն առնչութեամբ հետաքննութիւն սկսա՞ծ է, թէ՝ ոչ, ձեռնարկուա՞ծ են քայլեր եկեղեցւոյ անվտանգութիւնը ապահովելու համար, ովքե՞ր են Մարտ 6-ի յարձակման կասկածեալները, ինչո՞ւ այդ յարձակումը նախապէս չէ կանխուած:

Փայլան փորձած է ճշդել նաեւ, թէ թրքական իշխանութիւնները քայլեր ձեռնարկա՞ծ են Տրապիզոնի մէջ ապահովելու 2006 թուականէն յարձակումներու ենթարկուող քրիստոնեայ բնակչութեան անվտանգութիւնը, ինչպէս նաեւ կանխելու ընդհանուր առմամբ Թուրքիոյ մէջ ատելութեան հողի վրայ իրականացուող յանցագործութիւնները, որոնց թիւը տարուէ տարի կ՝աճի:

  • Facebook
  • Twitter
  • Delicious
  • LinkedIn
  • StumbleUpon
  • Add to favorites
  • Email
  • RSS