Խորհրդաժողովը Անդրադարձաւ ՀՅԴ Աշխարհատարած Լրատուամիջոցներու Գործունէութեան. Հաղորդագրութիւն

ARF_Khorhrtajoghov_31018

2018 Մարտ 10-12-ին Երեւանի մէջ գումարուեցաւ ՀՅԴ մամլոյ եւ տեղեկատուական այլ միջոցներու եւ հանրային կապերու պատասխանատուներու խորհրդաժողովը, որուն կը մասնակցէին 12 երկրէ շուրջ 40 խմբագիր եւ հանրային կապի պատասխանատու:

Խորհրդաժողովը անդրադարձաւ ՀՅԴ աշխարհատարած լրատուամիջոցներու գործունէութեան, արձանագրեց յաջողութիւններն ու առկայ հիմնահարցերը, քննարկեց հայաստանեան եւ hամահայկական խնդիրներու լուսաբանման հարցերը, արդի աշխարհի մէջ տեղեկատուական դաշտի դիմագրաւած մարտահրաւէրները, ՀՅԴ հանրային կապերու ռազմավարութեան սկզբունքները եւ իրականացման կառուցակազմերը:

Առանձին քննարկման նիւթ դարձաւ Հայաստանի Հանրապետութեան 100-ամեակի ձեռնարկներու հարցը՝ կուսակցական լրատուամիջոցներու ընելիքներու դիտանկիւնէն:

Խորհրդաժողովը կարեւոր համարեց գործակցութիւնը հայ մամուլի միւս միջոցներուն հետ՝ Հայաստանի, Արցախի, ազգային այլ խնդիրներու հետապնդումը համադրուած ջանքերով իրականացնելու գործին մէջ:

Մերժելով հակապետական, ապազգային, արտաքին եւ ներքին ապակառուցողական հակաքարոզչութիւնը, խորհրդաժողովը միաժամանակ կարեւոր համարեց մամուլի բազմակարծութիւնը, այլակարծութեան իրաւունքը եւ դատապարտելի համարեց ազատ խօսքի նկատմամբ դրսեւորուող որեւէ կաշկանդում:

ՀՅԴ Հանրային Կապերու Գրասենեակ

12 Մարտ 2018

Երեւան

 

  • Facebook
  • Twitter
  • Delicious
  • LinkedIn
  • StumbleUpon
  • Add to favorites
  • Email
  • RSS