Աղաւնոյի Մէջ եւս 20 Առանձնատուն Պիտի Կառուցուի. Արայիկ Յարութիւնեանը Պէյրութի Մէջ Մասնակցած է ԱՐԻ-ի Տարեկան Ժողովին

82382

Արցախի Հանրապետութեան պետական նախարար Արայիկ Յարութիւնեան, Մարտ 12-ին, աշխատանքային այցով մեկնած է Լիբանանի Հանրապետութիւն, ուր նոյն օրը մասնակցած է «Արցախ Րութս Ինվեսթմընթս» (ԱՐԻ) ընկերութեան տարեկան ժողովին:

ԱՀ պետական նախարարի աշխատակազմի տեղեկատւութեան եւ հասարակայնութեան հետ կապերու բաժինին փոխանցած տեղեկութիւններով`  պետական նախարարը Պէյրութի Հայ բարեգործական ընդհանուր միութեան «Տէմիրճեան» կեդրոնին մէջ կայացած ժողով ունեցած ելոյթով ողջունած է ընկերութեան տնօրէններու խորհուրդի անդամներն ու բաժնետէրերը եւ նշած, որ անցած ինը տարիներուն ընթացքին ԱՐԻ-ի ծրագիրները մեծապէս նպաստած են Արցախի տնտեսութեան զարգացման: Ա. Յարութիւնեանի խօսքով` հայրենիքի շէնացման ու զարգացման համար շատ կարեւոր է ներդրումներու ապահովումը, եւ, այդ առումով, ԱՐԻ-ի գործունէութիւնը օրինակելի է:

«Համոզուած եմ, որ տարիներու ընթացքին ընկերութեան բաժնետէրերուն թիւը պիտի աւելնայ, եւ յաջողած ծրագիրներու քանակն ու ծաւալները պիտի ընդլայնուին: Ատիկա կը վկայեն ո՛չ միայն կատարուած աշխատանքներուն արդիւնքները, այլեւ` տարուէ տարի նոր բաժնետէրերու ներգրաւումը ծրագիրներուն, որուն համար կ՝ուզեմ երախտագիտութիւնս յայտնել ԱՐԻ-ի բոլոր բաժնետէրերուն»,- ըսած է Ա. Յարութիւնեան:

ԱՀ պետական նախարարը իր խօսքին մէջ անդրադարձած է նաեւ վերջին տարիներուն Արցախի մէջ արձանագրուած տնտեսական յաջողութիւններուն: Ան նշած է, որ անցեալ տարին ամփոփուած է 15.6 տոկոս տնտեսական աճով, որ նորանկախ Արցախի պատմութեան մէջ ամենաբարձր ցուցանիշն է: Այս հարցով Ա. Յարութիւնեան կարեւոր համարած է նաեւ ԱՐԻ-ի ունեցած ներդրումը եւ յոյս յայտնած, որ յետայսու եւս անիկա իր ծանրակշիռ մասնակցութիւն պիտի ունենայ Արցախի տնտեսութեան զարգացման եւ բնակչութեան կեանքի որակի բարելաւման գործին մէջ:

Այնուհետեւ, ժողովի մասնակիցները ամփոփած են Քաշաթաղի շրջանի Աղաւնօ համայնքի բնակարանաշինութեան առաջին փուլին արդիւնքները: Նշուած է, որ համայնքի «Արիաւան» թաղամասին մէջ նախատեսուած 150 առանձնատուներէն 50-ը արդէն շահագործման յանձնուած է: Երկրորդ փուլի համար ԱՐԻ ընկերութեան տնօրէններու խորհուրդին կողմէ նախապէս կայացած հինգ առանձնատուներու կառուցման որոշումը փոխուած է, երբ Ա. Յարութիւնեան յայտարարած է, որ Արցախի կառավարութիւնը իր բաժին մասնակցութիւնը պիտի ունենայ անոնց կառուցման մէջ:

Իբրեւ արդիւնք, նոր որոշում ընդունուած է կառուցելու 20 առանձնատուն, եւ ժողովի աւարտին ծրագիրը իրենց ստորագրութեամբ վաւերացուցած են պետական նախարար Արայիկ Յարութիւնեանը,ԱՐԻ ընկերութեան նախագահ Սուրէն Սարգսեանը եւ «Արցախ ֆոնտ» կազմակերպութեան ատենապետ Մելքոն Յակոբեանը: ԱՐԻ ընկերութեան տարեկան ժողովին կը մասնակցէր նաեւ Մերձաւոր Արեւելքի երկիրներու մէջ ԱՀ մշտական ներկայացուցիչ Կարապետ Քէպապճեանը:

Նշենք, որ ԱՀ պետական նախարար Ա. Յարութիւնեան, Մարտ 13-ին, Պէյրութէն աշխատանքային այցով մեկնած է Աւստրալիա:

  • Facebook
  • Twitter
  • Delicious
  • LinkedIn
  • StumbleUpon
  • Add to favorites
  • Email
  • RSS