«Արաս» Հրատարակչութենէն Լոյս Տեսաւ «Երբ Պատանի Ենք» Խորագիրով Գիրքը

ARAS

«Արաս» հրատարակչութիւնը ուսումնական այս նոր տարեշրջանին, մանաւանդ դպրոցական հասակի պատանիներուն կը ներկայանայ հայ գրականութեան ընտրանիով մը: «Երբ Պատանի Ենք» գիրքը նախատեսուած է ո՛չ միայն դպրոցականներուն համար, այլ տարիքի ընթերցողներու համար առհասարակ:

«Երբ Պատանի Ենք» գիրքով կարելի է ծանօթանալ ժամանակակից հայ գրողներու պատմուածքներէն խտացուած ու պարզացուած նմոյշներու, որոնց մէջ հերոսները կ՛երեւին իրենց մանուկի կամ պատանիի յուզումներով ու ապրումներով: Ամերիկայի մէջ դէպի Արարատ ճանապարհորդութեան ձեռնարկող միամիտ տղաքը, Երուսաղէմի վանքին մէջ հայկական իր արմատները վերագտնող լեհը, սիրոյ առաջին յուզումն ու արկածները ապրող պարման ու պարմանուհիները, ձիուն շնորհիւ կեանքին բռնուող սասունցի պատանին, լեռնային ոգիներով հետաքրքիր աղջնակը, հետագային արուեստագէտ դարձած մանուկը կամ Հայաստանի անկախութեամբ տակնուվրայ եղած երիտասարդները եւ աւելին՝ ո՛չ միայն ընթերցանութեան նիւթ կը մատակարարեն, այլ նաեւ առիթ կը դառնան մտորելու այս եւ այլ նիւթերու մասին:

Իւրաքանչիւր պատմուածքէ ետք զետեղուած է բառարան մը: Իսկ գիրքի աւարտին կան խաղ-հարցարաններ, որոնց շնորհիւ ընթերցողները պիտի կարենան թարմացնել իրենց կարդացածներուն տպաւորութիւնը, ինչպէս նաեւ քննել իրենց յիշողութիւնը:

Գիրքին համար հիմք հանդիսացած է սփիւռքահայ վաստակաշատ մանկավարժներ Մարօ Գալայճեան-Քիւրքճեանի եւ Յարութիւն Քիւրքճեանի կողմէ 2006ին հրատարակուած «Հայրենի Աղբիւր» գրադարանի վեցերորդ գիրքը՝ «Տասը Աշխարհ»ը:

Կարդալով այս պզտիկ գիրքը՝ ընթերցողը պիտի կատարէ մեծ շրջապտոյտ մը՝ երկրային ու աննիւթական աշխարհագրութիւններու վրայ, հաւասարապէս: Կարօ Սասունիի, Լուիզա Ասլանեանի, Յակոբ Մնձուրիի, Զապէլ Եսայեանի, Գուրգէն Մահարիի, Մուշեղ Իշխանի, Անդրանիկ Ծառուկեանի, Զարեհ Որբունիի, Ուիլեըմ Սարոյեանի, Յակոբ Կարապենցի, Մկրտիչ Մարկոսեանի, Վահրամ Մավեանի, Վեհանուշ Թեքեանի, Մարուշի, Վահէ Պէրպէրեանի ու Վահէ Օշականի պատմուածքները տեղադրուած են մանկութենէ դէպի վաղ երիտասարդութիւն ընթացող ժամանակագրութեամբ:

  • Facebook
  • Twitter
  • Delicious
  • LinkedIn
  • StumbleUpon
  • Add to favorites
  • Email
  • RSS