Արցախցի Մարզիկները Արժանացած են Ոսկէ Մետալներու

82338

Արցախի «Արմֆայթինգ» ֆետերասիոնի 11 մարզիկներ, Մարտ 9-10 մասնակցած են ՀՀ Էջմիածին քաղաքին մէջ տեղի ունեցած «ArmFighting Selection Challenge» 47-րդ մրցաշարին:

Ըստ «Արցախփրես»-ի՝ Արցախի «Արմֆայթինգ» արհեստավարժ ֆետերասիոնի հաւաքականի գլխաւոր մարզիչ Արմէն Հայրապետեան ըսած է, որ ընդհանուր մրցաշարին մասնակցած է 4-40 տարեկան տարիքային խումբի շուրջ 400 մարզիկ:

Արցախցի 9 մարզիկներ գրաւած են առաջին տեղը` արժանանալով ոսկէ մետալներու եւ պատուոգիրներու, իսկ երկուքը երկրորդ տեղը` ստանալով արծաթէ մետալներ:

Մարզիչին կարծիքով` մրցաշարքի արդիւնքները գոհացուցիչ են:

Ոսկէ մետալակիր Վահրամ Յարութիւնեան ըսած է, որ ինք արդէն 3 տարիէ կը մարզուի եւ մասնակցած է տարբեր մրցաշարերու:

«Այս   մրցաշարքին  52-60 քկ․ դասակարգին մէջ մրցած եմ 17-18 տարիքային խումբի մարզիկներու հետ, եւ գրաւած եմ առաջին տեղը: Յաղթանակս կը նուիրեմ իմ սիրելիին` գարնանային տօներու առիթով»,-նշած է մարզիկը:

Իսկ 68 քկ․ դասակարգին մէջ 23 տարեկան տարիքային խումբին մէջ ոսկէ  մետալի  արժանացած  Եուրի Գրիգորեան ըսած է, որ ինք,  9 անգամ  մրցաշարերու մասնակցելով, միշտ  ալ  զբաղեցուցած է առաջին տեղը` բարձր պահելով Արցախի պատիւը:

Մարզիկը  նաեւ  նշած  է, որ  ինք նպատակ ունի` մասնակցիլ միջազգային մրցաշարերու   եւ   ունենալ  լուրջ  յաջողութիւններ:

  • Facebook
  • Twitter
  • Delicious
  • LinkedIn
  • StumbleUpon
  • Add to favorites
  • Email
  • RSS