Սերպիոյ Խորհրդարանը Մերժած է Հայոց Ցեղասպանութիւնը Ճանչնալու Ընդդիմութեան Առաջարկը

82135

Սերպիոյ խորհրդարանը մերժած է ընդդիմութեան առաջարկը՝ Հայոց Ցեղասպանութիւնը ճանչնալու մասին:

Վերջին տասնամեակին նման առաջարկներ քանի մը անգամ ներկայացուած են սերպական խորհրդարանին մէջ, սակայն անոնք մշտապէս մերժուած են։ Այս մասին կը հաղորդէ «Ազատութիւն» ռատիոկայանի պալգանեան ծառայութիւնը:

Օսմանեան Թուրքիոյ մէջ մէկուկէս միլիոն հայերու ցեղասպանութիւնը ճանչցող բանաձեւը այս անգամ ներկայացուցած էր Սերպիոյ նախկին վարչապետ Զորան Զիւգովիչը, որ ներկայիս կը գլխաւորէ «Նոր կուսակցութիւն» քաղաքական ուժը:

Շուրջ 7 միլիոն բնակչութիւն ունեցող Սերպիան, որ նոյնպէս անցեալ դարասկիզբին կը գտնուէր Օսմանեան կայսրութեան մէջ, սակաւաթիւ հայ համայնք ունեցող երկիրներէն է. տարբեր գնահատականներով` այստեղ կը բնակի մինչեւ 300 հայ:

Հակառակ այդ հանգամանքին` Սերպիոյ նախագահը մէկն էր այն օտարերկրեայ առաջնորդներէն, որոնք 2015 Ապրիլ 24-ին, Երեւանի մէջ կը մասնակցէին Հայոց Ցեղասպանութեան 100-րդ տարելիցին նուիրուած ձեռնարկներուն: «Չէինք կրնար յանդգնիլ այստեղ չըլլալ, մեզի համար չգալու տարբերակը չկար»,- Ծիծեռնակաբերդի յուշահամալիրին մէջ յայտարարած էր Սերպիոյ այժմ արդէն նախկին նախագահ Դոմիսլաւ Նիկոլիչը: «Ինչպէ՞ս կրնանք մենք այսօր այստեղ չըլլալ եւ ինչպէ՞ս կրնանք դաւաճանել միլիոնաւոր զոհերու յիշատակին, ինչպէ՞ս չճանչնանք ճշմարտութիւնը, ինչպէ՞ս չսորվինք ճշմարտութեան այն դասերը, որոնք մարդկութիւնը դասաւանդած եւ աւանդած է շատոնց,- ըսած էր ան:

Ինչո՞ւ սերպական խորհրդարանը կը խուսափի պաշտօնապէս իբրեւ ցեղասպանութիւն ճանչնալէ 1915-ի իրադարձութիւնները: Նախկին Հարաւսլաւիոյ արտաքին գործոց նախարարի նախկին օգնական Ալեքսանդրա Եոսգիմովիչի կարծիքով` Սերպիոյ համար շուտ է նման հարցերով զբաղիլը: «Սերպիան աւելի հրատապ հարցեր ունի կարգաւորելու, նախ եւ առաջ` Եւրոմիութեան ապագայ անդամակցութեան հետ կապուած»,- ըսած է սերպ դիւանագէտը:

  • Facebook
  • Twitter
  • Delicious
  • LinkedIn
  • StumbleUpon
  • Add to favorites
  • Email
  • RSS