Այդ Սոսկալի Արարքը Չի Խոչընդոտեր Րաֆֆիին՝ Առանց Սահմանափակումներու Շարունակելու Իր Ուղին. Թիւֆենկեան Հիմնադրամ

LOGO_TF

Հաղորդագրութիւն Թուֆենկեան հիմնադրամի

Հանրութեան մէջ արդէն յայտնի է, որ անցեալ շաբաթ, մարդասիրական առաքելութեամբ Լիբանան այցի ընթացքին, դաժան ծեծի ենթարկուած է յայտնի հայ գրող, հրապարակախօս եւ հանրային գործիչ Րաֆֆի Տուտագլեանը: Մենք կը գրենք՝ յայտնելու մեր խիստ մտահոգութիւնը Պէյրութի Պուրճ Համուտ թաղամասի սրտին մէջ կատարուած այս նենգ յարձակման վերաբերեալ:

Առկայ են ապացոյցներ, որ կատարուածը պատահական բռնարարք չէր: Ընդհակառակը, առկայ ապացոյցները ցոյց կու տան, որ յարձակումը եղած է կանխամտածուած, իսկ Րաֆֆին` անոր թիրախը: Պարզ բացատրութիւն չկայ առ այն, թէ որուն կողմէ եւ ինչու կատարուած է ատիկա:

Իբրեւ մտահոգ մասնաւոր քաղաքացի, Րաֆֆին պարբերաբար կը գրէ հայ հանրութեան առջեւ ծառացած հասարակական դժուարութիւններու, անհաւասարութիւններու եւ անարդարութիւններու մասին: Այս յօդուածները լայն տարածում ստացած են, եւ աներեւակայելի չէ, որ այս գրութիւններն իսկ յանգեցուցած են Րաֆֆիի հանդէպ բռնարարքին: Եթէ իրօք այդպէս է, ուրեմն այս յարձակումը ծանր մտահոգութեան խնդիր է բոլորիս համար: Խօսքի ազատութիւնը մարդու հիմնարար իրաւունք է, եւ մեզի համար անընդունելի է, որ ոեւէ անձ, կամ անձերու խումբ, կրնայ ընտրել բռնութեան ուղին` սեփական անհամաձայնութիւնը կամ առարկութիւնները բարեկիրթ բանավէճի միջոցով արտայայտելու փոխարէն:

Կատարուածը մեզի համար յատկապէս մտահոգիչ է Րաֆֆիի աշխատանքային դիրքին եւ գործունէութեան ծիրէն ներս: Իբրեւ Թուֆենկեան հիմնադրամի տնօրէն, Րաֆֆին մեծապէս նպաստած է Հայաստանի մէջ քաղաքացիական հասարակութեան զօրեղացման մեր նպատակի իրականացման եւ Արցախի մէջ տնտեսական եւ ենթակառուցուածքային զարգացման ուղղուած ծրագիրներու իրագործման: Աւելին, անոր ջանքերը ազնուօրէն կը ծառայեն արդար, առաջադէմ եւ ապահով հայրենիքի մեր ընդհանուր տեսլականին:

Մենք կ՝ակնկալենք, որ այս յանցագործութեան նկատմամբ իրաւասութիւն ունեցող մարմինները պիտի իրականացնեն համապարփակ հետաքննութիւն եւ պատասխանատւութեան պիտի ենթարկեն յանցանքի համար պատասխանատուները: Նման յանցաւոր գործողութիւնները պէտք չէ թոյլատրելի ըլլան մեր հայ համայնքին մէջ:

Միեւնոյն ժամանակ, մենք կը շարունակենք խրախուսել Րաֆֆիի ներգրաւուածութիւնը քաղաքացիական հասարակութեան մէջ: Յոյսով ենք, որ այս սոսկալի արարքը չի խոչընդոտեր անոր ազատօրէն եւ առանց սահմանափակումներու շարունակելու իր ուղին: Մենք Րաֆֆիին արագ ապաքինում կը մաղթենք:

Թուֆենկեան հիմնադրամի հոգաբարձուներու խորհուրդ, ԼՂՀ ծրագիր

7 Մարտ 2018թ.

  • Facebook
  • Twitter
  • Delicious
  • LinkedIn
  • StumbleUpon
  • Add to favorites
  • Email
  • RSS