Գարեգին Արքեպիսկոպոս Պէքճեան Կը Հեռանայ Պոլիսէն. Ան Հրաժեշտի Նամակ Հրապարակած է

bekjian

Գարեգին արքեպիսկոպոս Պէքճեան, զոր թրքական իշխանութիւնները պաշտօնապէս հրաժարեցան ճանչնալէ իբրեւ Պոլսոյ Հայոց պատրիարքական տեղապահ, Թուրքիայէն հեռանալէ առաջ՝ հրապարակած է հրաժեշտի նամակ մը: Այս մասին կը յայտնէ «Ակօս» պարբերականը:

Նամակին մէջ Պէքճեան յիշեցուցած է, որ 2016 Հոկտեմբեր 25-ին, Հոգեւոր խորհուրդի որոշումով՝ հաշուի առնելով պատրիարք Մեսրոպ Մութաֆեանի առողջական վիճակը՝ պատրիարքական աթոռը «թափուր» յայտարարուած էր եւ Պոլսոյ Հայոց 85-րդ պատրիարքի ընտրութեան հարցը կրկին յայտնուած էր օրակարգի վրայ: Ան նշած է, որ պատրիարքական փոխանորդ Արամ արքեպիսկոպոս Աթէշեանի հրաւէրով՝ պատրիարքական տեղապահի ընտրութիւններուն մասնակցելու նպատակով՝ ժամանած էր Պոլիս, ուր 2017-ի Մարտ 15-ին՝ 23 կողմ եւ 11 դէմ ձայնով տեղապահ ընտրուած էր:

«Աւելի քան 50 տարի արտերկրի մէջ ծառայութենէն ետք՝ Թուրքիա գալուս պատճառը ինը տարի շարունակուող անցումային շրջանին վերջ տալն էր: Կը կարծէի, որ այս հարցով բաւական պիտի ըլլար շարժիլ հաւատքով եւ խիղճով, որպէսզի մեր եկեղեցին ու ժողովուրդը պատրիարքի ընտրութեան համար յաջողութեան հասնէր: Միայն հիմա կը հասկնամ, թէ որքան սխալած եմ»,- նամակին մէջ գրած է Պէքճեան:

Ան պատմած է, որ պաշտօնը ստանձնելէն անմիջապէս ետք՝ առերեսուած է ապշեցնող իրականութեան հետ: «Ատոնցմէ ամենակարեւորը այն էր, որ արդէն առաջին իսկ օրուընէ պարզ դարձաւ, որ ընտրական գործընթացը հնարաւոր պիտի չըլլայ առաջ տանիլ թափանցիկ՝ արդար ընտրական կանոններով: Անհրաժեշտ չեմ համարեր թուարկել ատոնց բոլոր օրինակները: Այդ ցաւալի եւ վշտացնող օրինակները ո՛չ կը ցանկամ յիշել, ո՛չ ալ յիշեցնել»,- ըսած է Սրբազանը:

Իբրեւ այլ տխրեցնող փաստ մը, որուն ան առերեսուած է, Պէքչեան նշած է, որ զգալիօրէն նուազած են համայնքին մէջ այն հոգեւորականներու ու աշխարհիկ անձերու թիւը, որոնք մեծ կամքի տէր են, շատ լաւ գիտեն մեր պատմութեան ու համայնքի արժէքները:

«Վերջին իրադարձութիւնները մէկ օրուան հետեւանք չեն: Ափսոս, որ այս գործընթացը, որ կարծես զիս թիրախ ընտրած էր, իրականութեան մէջ նպատակ ունէր խափանելու 85-րդ պատրիարքի ընտրութիւնները։ Ասիկա երկարատեւ եւ ծրագրուած արշաւի արդիւնք էր, որ սկսաւ տեղապահ ընտրուելուս առաջին իսկ օրէն: Կրկին գործի դրուեցան տխրեցնող, ցաւցնող հնարքներ: Այս մութ արշաւները շատ տգեղ չափերու հասան: Կը վախնամ, որ այս ամէնը աւելի պիտի մասնատէ մեր համայնքը»,- ըսած է Պէքճեան:

Միւս կողմէ ան յոյս յայտնած է, որ կատարուածը համայնքի համար ուսանելի ըլլայ:

Գարեգին արքեպիսկոպոս Պէքճեան նշած է, որ մասնաւորապէս Թուրքիոյ ներքին գործոց նախարարութենէն եկած գրութենէն ետք՝ ստիպուած է հեռանալու Պոլիսէն` ընդգծելով, որ էութեամբ հակամարտող մարդ չէ:

«Մեր կրօնը խոնարհութիւն եւ համբերատարութիւն քարոզելէ զատ սիրոյ եւ խաղաղութեան կրօն է: Իմ ներկայութիւնը պէտք չէ որեւէ կերպով աւելի շատ վնաս հասցնէ առանց այդ ալ մեծ վնասներ կրած հայ համայնքին»,- նամակին մէջ ըսած է Սրբազանը` ընդգծելով, որ ղեկավարներն ու համայնքը պէտք է կարենան ապագային առնչուող քայլերը առնել առանց իր ներկայութեան:

«Որոշեցի հեռանալ երկրէն` գալիք շրջանին նոր ծառայութեան անցնելու նպատակով, աղօթելով երկար ժամանակ հիւանդութեան մէջ գտնուող Մեսրոպ արքեպիսկոպոս Մութաֆեան եղբօրս, անոր թանկագին մօր` Մարի Մութաֆեանին եւ ձեր` իմ սիրելի հոգեւոր եղբայրներուս համար»,- ըսած է Պէքճեան` վերջաւորութեան յորդորելով երբեք չկորսնցնել հաւատքն ու յոյսը:

  • Facebook
  • Twitter
  • Delicious
  • LinkedIn
  • StumbleUpon
  • Add to favorites
  • Email
  • RSS