Արմէն Սարգսեանը Ընդունելի Է Նաեւ Սփիւռքի Մէջ. Մուրատ Փափազեան

muradpapazian

Ֆրանսայի Հայկական կազմակերպութիւններուն աշխատանքը համակարգող խորհուրդի նախագահ, ՀՅԴ Բիւրոյի անդամ Մուրատ Փափազեան յայտարարած է, թէ նախագահ Սերժ Սարգսեանի կողմէ իբրեւ նախագահի թեկնածու  Բրիտանիոյ դեսպան Արմէն Սարգսեանը առաջադրելը շատ լաւ  որոշում է: Անոր դիտարկումով` Արմէն Սարգսեան լաւագոյն թեկնածուն է նախագահի պաշտօնին համար, ան նաեւ ընդունելի եւ ընկալելի է Սփիւռքի մէջ, աւելի լաւ թեկնածու կարելի չէ պատկերացնել: Այս մասին կը հաղորդէ Tert.am-ը։

«Ան տարիներ շարունակ գործած է Սփիւռքի մէջ` յատկապէս Անգլիոյ: Բայց ան նաեւ կը ճանչնայ Սփիւռքի բոլոր կազմակերպութիւնները: Լաւ  ընտրութիւն է: Ան Հայաստանի զարգացման գործին մէջ իր ներդրումը  ունեցած է, եւ բոլոր հոսանքներուն հետ դրական յարաբերութիւններ հաստատած է»,- նշեց ան:

Անդրադառնալով այն հարցումին, թէ Սփիւռքը պէ՞տք է իր մասնակցութիւնն ու կարծիքը յայտնէ Հայաստանի ներքաղաքական զարգացումներուն վերաբերեալ՝ ՀՅԴ Բիւրոյի անդամը պատասխանած է, թէ Հայաստանի շահն է, որ Սփիւռքը ունենայ ներդրում Հայաստանի մէջ, որ Սփիւռքը կարենայ օժանդակել Հայաստանին նաեւ ներքաղաքական կեանքին մէջ:

«Մենք ուրիշ նպատակ չունինք: Եթէ մենք կը նշենք, որ մէկ ժողովուրդ ենք, մէկ ազգ, նաեւ` պէտք է ընդունինք, որ սփիւռքի ներդրումը կրնայ  դրական ըլլալ, եթէ սփիւռքը իր ներդրումը ունենայ նաեւ ներքաղաքական կեանքին մէջ, թէ ինչպէ՛ս, չեմ մանրամասներ, բայց պէտք է համախմբուի այդ հարցին շուրջ եւ այդպէս շահ բերէ  Հայաստանին»,- նշած է ան:

Դիտարկումին, թէ ի՞նչ կարծիք ունի` ներկայիս իշխանութիւնները կարեւոր կը նկատե՞ն Սփիւռքի կարծիքը Հայաստանի մէջ տեղի ունեցող զարգացումներուն վերաբերեալ, Մուրատ Փափազեան պատասխանած է. «Շատ անբաւարար ձեւով, եւ ատիկա մեղք է: Ես կրնամ հաստատել, որ այսօրուան իշխանութիւնները սփիւռքը չեն արժեւորեր, սփիւռքը պէտք է քաջալերեն, որ ներդրում ունենան Հայաստանի մէջ` ո՛չ միայն տնտեսական, այլ նաեւ` սփիւռքի փորձառութիւնը օգտագործեն: Ի վերջոյ, մենք ունինք կազմակերպութիւններ, կուսակցութիւններ սփիւռքի մէջ, եւ յատկապէս Դաշնակցութիւնը, որ ունի լուրջ 127 տարուան  փորձառութիւն, ունի կապեր, ազդեցութիւն: Դժբախտաբար, անբաւարար ձեւով կ՛օգտագործուի այդ ուժը»:

Պատասխանելով այն հարցումին, թէ ի՞նչ սպասումներ կան նոր վարչապետի ընտրութենէն, ՀՅԴ Բիւրոյի անդամը նշած է, որ տակաւին այս մասին որեւէ բան ըսել չի կրնար, քանի որ կուսակցութիւնը կը քննարկէ հարցը: «Դաշնակցութիւնը տակաւին պէտք է քննէ հարցը, եւ պէտք է որոշումը քննարկումէն ետք` հաւաքական ձեւով ներկայացնենք»,- ըսած է ան:

  • Facebook
  • Twitter
  • Delicious
  • LinkedIn
  • StumbleUpon
  • Add to favorites
  • Email
  • RSS