Հրանդ Տինքի Նահատակութեան 11-րդ Տարելիցին Նուիրուած Քննարկում Եւ Հոգեհանգիստ

0000dink-OIA

Կազմակերպութեամբ Լոս Անճելըսի Պոլսահայ միութեան,  Յունուար 20-ին տեղի պիտի ունենան Հրանդ Տինքի նահատակութեան 11-րդ տարելիցին նուիրուած քննարկում եւ հոգեհանգիստ, ինչպէս նաեւ՝ մեծարում:

Ըստ «Ասպարէզ»-ի՝ հոգեհանգստեան եւ ծաղկեպսակներ զետեղելու արարողութիւնները պիտի կայանան կ.ե. ժամը 2-ին, Հայոց Ցեղասպանութեան Մոնթեպելլոյի յուշարձանին առջեւ (Bicknell Park 850 Via San Clemente, Montebello, CA 90640):

Երեկոյեան ժամը 6-ին պիտի սկսի քննարկումը՝ Պոլսահայ միութեան կեդրոնին մէջ (19726 Sherman Way, Winnetka, CA 91306), որուն ընթացքին Հրանդ Տինքի անուան շքանշանը պիտի շնորհուի ֆրանսահայ հասարակական ու քաղաքական գործիչ՝ Արցախի ազատամարտի մասնակից ու Հրանդ Տինքի մանկութեան ընկեր Սարգիս Հացպանեանին:

Ձեռնարկի գլխաւոր բանախօսն է փրոֆ. Ասլը Պալի, իսկ զեկուցողները պիտի ըլլան՝ տոքթ. Սինան Պիրտալ, դոկտ. Ռիւքեն Շենկիւլ եւ դոկտ. Եքթան Թիւրքլըլմազ։ Բանախօսութիւններէն ետք կայանալիք քննարկումը պիտի առաջնորդեն փրոֆ. Ասլը Պալի եւ Պոլսահայ միութեան հոգաբարձութեան ատենապետ իրաւաբան Էտվին Մինասեան, որ նաեւ պիտի ստանձնէ հանդիսավարի պարտականութիւնը։

Բացման խօսքը պիտի արտասանէ տոքթ. Յովհաննէս Գուլակ Աւետիքեան։

Մուտքը ազատ է, իսկ աւարտին տեղի պիտի ունենայ հիւրասիրութիւն, Պոլսահայ միութեան կեդրոնի «Հրանդ Տինք» սրահին մէջ:

Յաւելեալ տեղեկութեանց համար, դիմել տոքթ. Յովհաննէս Գուլակ Աւետիքեանին՝ (818) 800-1976 թիւով:

  • Facebook
  • Twitter
  • Delicious
  • LinkedIn
  • StumbleUpon
  • Add to favorites
  • Email
  • RSS