Գրքահաւաք` Թալիշի Դպրոցի Գրադարանին Համար

books

Թալիշի միջնակարգ դպրոցի համար գրքահաւաքը նախաձեռնողներէն է  Արցախի ԱԺ նախագահի մամուլի քարտուղար Անոյշ Ղաւալեանը: Panorama.am-ը՝ նշեալ խնդիրին շուրջ՝ զրուցած է Ղաւալեանի հետ:

Թալիշի միջնակարգ դպրոցը գիրքերու անհրաժեշտութեան հարցը բարձրացուցած է ԱԺ նախագահի այցին ժամանակ, ու այժմ իրենք, Արցախի ժողովրդավարական կուսակցութեան միջոցով, կը փորձեն լուծել այդ խնդիրը:

Գրադարանը տուժած է 2016 ապրիլեան քառօրեայ պատերազմին ժամանակ, երբ այնտեղ արկ ինկած էր:

Աշակերտները դասագիրքերով ապահովուած են, սակայն գեղարուեստական գրականութեան կարիք կայ:

Պահանջուած են հայ, ռուս եւ արտասահմանեան դասական հեղինակներու ստեղծագործութիւններ: Ցանկալի է, որ գիրքերը ըլլան հայերէն, թէեւ կարելի է նաեւ ռուսերէն ու անգլերէն:

Նախաձեռնութիւնը բաց է, կրնան միանալ բոլոր ցանկացողները` Ստեփանակերտի ու նաեւ Երեւանի մէջ: Օգնել փափաքողները կրնան դիմել Երեւանի մէջ Արցախի ներկայացուցչութիւն` Նայիրի Զարեան 17ա հասցէով, Ստեփանակերտի մէջ` Գարեգին Նժդեհի 68 հասցէին գործող Արցախի ժողովրդավարական կուսակցութեան գրասենեակ:

Անոյշ Ղաւալեան նշած է, որ իրենք կը համագործակցին բոլորի հետ, ու կ՝ակնկալեն նոյնիսկ պետութեան մասնակցութիւնը:
Գրքահաւաքը պիտի շարունակուի մինչեւ Փետրուար 20:

  • Facebook
  • Twitter
  • Delicious
  • LinkedIn
  • StumbleUpon
  • Add to favorites
  • Email
  • RSS