Պէտք Է Կիրարկել Ո՛չ Թէ «Ցեղասպան Գործողութիւններ, Այլ «Ցեղասպանութիւն» Եզրը. Ռուստամեան

Armen_11118

ՀՀ Ազգային ժողովի արտաքին յարաբերութիւններու մնայուն յանձնախումբին մէջ կը քննարկուի ահաբեկչական խմբաւորումներու կողմէ վերահսկուող Իրաքի Հանրապետութեան տարածքներուն մէջ եզիտի ժողովուրդին նկատմամբ ցեղասպան գործողութիւններու դատապարտման մասին նախագիծը:

Ազգային ժողովի ՀՅԴ խմբակցութեան ղեկավար Արմէն Ռուստամեանին անհանգստացուցած է նախագիծին անուանումը: «Որքանո՞վ  նպատակայարմար է, որ կը կիրարկենք «ցեղասպան գործողութիւններ» եզրոյթը: Ասիկա տպաւորութիւն կը ստեղծէ, որ ատիկա ո՛չ թէ ցեղասպանութիւն է, այլ ցեղասպանութեան տարրեր պարունակող գործողութիւններ»,- ըսած է ան:

Պատգամաւորը ընդգծած է, որ եթէ կ՛ուզենք դատապարտել ցեղասպանութիւնը` իր ամբողջութեամբ, ճիշդ պիտի ըլլայ կիրարկել «ցեղասպանութիւն» եզրոյթը եւ ըսել, որ եզիտի ժողովուրդին դէմ կատարուած ցեղասպանութիւնը կը դատապարտենք:

«Կը հասկնամ` այս եզրոյթը անգլերէնէ «ճենոսայթ էքթ»-ի թարգմանութիւնն է, բայց ճիշդ չի հնչեր, պէտք է կիրարկենք «ցեղասպանութիւն» եզրը»,- շեշտած է Ռուստամեան:

Հարցով հիմնական զեկուցող` հանրապետական պատգամաւոր Ռուստամ Մախմուտեան նշած է, որ կը կիսէ Ռուստամեանի կարծիքը: «Սակայն «ցեղասպան գործողութիւն» եւ «ցեղասպանութիւն» եզրերը միջազգային իրաւունքի տեսանկիւնէն նոյն բանն են: Իմ պատկերացումով ալ` այդ եզրերուն միջեւ տարբերութիւն չկայ»,- ըսած է ան:

Յանձնախումբի նախագահ Արմէն Աշոտեան, իր հերթին, նշած է, որ կը հասկնայ Ռուստամեանի դիտարկումը: «Խնդիրը հետեւեալն է` «ցեղասպանութիւն» եզրը կարելի է օգտագործել այն պարագային, երբ անիկա կատարուած է պետութեան կողմէ, իսկ այս պարագային պետութիւն չէ, այլ ահաբեկչական խմբաւորումներու կողմէ կատարուած, իսկ «ցեղասպանութիւն» եզրը կիրարկելը աւելի յստակ կ՛ըլլայ, եթէ կը կատարուի պետութեան կողմէ: «Ցեղասպան գործողութիւն» արտայայտութիւնը գիտական եզր է, հիմա մենք կը ճանչնանք ցեղասպան գործողութիւնը, իսկ ցեղասպան գործողութիւններէն իւրաքանչիւրը ցեղասպանութիւն է, այսինքն` ցեղասպան գործողութիւնը ճանչնալով` կը ճանչնանք ցեղասպանութիւնը»,- ըսած է ան:

 

  • Facebook
  • Twitter
  • Delicious
  • LinkedIn
  • StumbleUpon
  • Add to favorites
  • Email
  • RSS