ՀՀ Նախագահին Իր Հաւատարմագիրները Յանձնած Է Լիբանանի Նորանշանակ Դեսպանը

Sargsyan_Lebanon_11118

ՀՀ նախագահ Սերժ Սարգսեանին իր հաւատարմագիրները յանձնած է Հայաստանի Հանրապետութեան մէջ Լիբանանի նորանշանակ արտակարգ եւ լիազօր դեսպան Մայա Տաղերը:

Շնորհաւորելով դեսպանը նշանակման առիթով` հանրապետութեան նախագահը վստահութիւն յայտնած է, որ ան առաւելագոյն ջանք պիտի ներդնէ երկու երկիրներուն միջեւ յարաբերութիւններու զարգացման եւ ամրապնդման գծով: Նախագահ Սարգսեան ուրախութեամբ  արձանագրած է, որ Հայաստանի եւ Լիբանանի միջեւ յարաբերութիւնները, հիմնուած ըլլալով երկու ժողովուրդներու դարաւոր բարեկամութեան վրայ, տարուէ տարի կը խորանան եւ կ՛ամրապնդուին: Նախագահին համոզումով` դիւանագիտական յարաբերութիւններու  հաստատումէն ետք անցած 25 տարիներուն ընթացքին երկու երկիրները  յաջողած են կառուցել այնպիսի յարաբերութիւններ, որոնց բնորոշ են բարձր մակարդակի քաղաքական երկխօսութիւնը, փոխադարձ վստահութիւնը, ինչպէս նաեւ սերտ համագործակցութիւնը փոխադարձ հետաքրքրութիւն ներկայացնող բոլոր բնագաւառներուն մէջ:

Նախագահ Սերժ Սարգսեան շնորհակալութիւն յայտնած է բարեկամ Լիբանանի իշխանութիւններուն եւ ժողովուրդին` լիբանանահայերուն նկատմամբ տասնամեակներ շարունակ ցուցաբերուող ջերմ վերաբերմունքին համար, ինչ որ անոնց կարելիութիւն տուած է ո՛չ միայն պահպանելու իրենց ինքնութիւնը, այլ նաեւ զարգանալու եւ աշխուժօրէն մասնակցելու երկրի ընկերային-տնտեսական կեանքին:

Դեսպան Մայա Տաղեր շնորհակալութիւն յայտնած է  հանրապետութեան նախագահին ընդունելութեան եւ շնորհաւորանքին  համար` համակարծիք ըլլալով նախագահին հետ, թէ հակառակ անոր որ երկկողմանի միջպետական յարաբերութիւնները միայն 25 տարուան  պատմութիւն ունին, սակայն անոնք շատ ամուր են` հիմք ունենալով երկու ժողովուրդներու բարեկամութիւնը:

Դեսպան Տաղեր դրուատանքով խօսած է Լիբանանի հայ համայնքին  մասին, որ աշխուժ մասնակցութիւն ունի երկրի զարգացման գործին մէջ:

Զրուցակիցները գոհունակութեամբ արձանագրած են, որ Հայաստանը եւ Լիբանանը արդիւնաւէտօրէն կը համագործակցին նաեւ միջազգային կազմակերպութիւններու շրջագիծին մէջ: Հանրապետութեան նախագահը եւ Լիբանանի դեսպանը երկուստեք կարեւոր նկատած են Հայաստանի տնտեսութեան նկատմամբ լիբանանցի գործարարներուն աճող հետաքրքրութիւնը` ընդգծելով ներդրումներու խրախուսման եւ գործարարներու միջեւ յարաբերութիւններու աշխուժացման  անհրաժեշտութիւնը:

Հանդիպումին անդրադարձ կատարուած է նաեւ միջազգային արդի խնդիրներուն եւ մարտահրաւէրներուն:

 

  • Facebook
  • Twitter
  • Delicious
  • LinkedIn
  • StumbleUpon
  • Add to favorites
  • Email
  • RSS