ԱԺ Նախագահը Պարգեւատրած է «Արարատ-73» Ֆութպոլի Խումբի Անդամները

918566

ՀՀ ԱԺ նախագահ Արա Բաբլոյեանի կարգադրութեամբ՝ մարմնակրթութեան եւ հասարակական գործունէութեան բնագաւառներուն մէջ ունեցած նշանակալի աւանդին համար՝ ՀՀ ԱԺ պատուոյ մետալով պարգեւատրուած են Արկադի Անդրէասեանը, Ալիոշա Աբրահամեանը, Սերգէյ Պօղոսեանը, Նորայր Մեսրոպեանը, Սուրէն Մարտիրոսեանը, Նիկոլայ Ղազարեանը, Էդուարդ Մարգարովը, ՀՀ ԱԺ նախագահի յուշամետալով` Ռուդիկ Բարսեղեանը: Այս մասին կը տեղեկացնեն ՀՀ ԱԺ հանրային կապերու վարչութենէն:

Յունուար 11-ին, յանձնելով պարգեւները «Արարատ-73» ֆութպոլի խումբի անդամներուն` ՀՀ ԱԺ նախագահը նշած է. «Այն, ինչ 1973 թուականին իրագործեցիք դուք եւ Երեւանի «Արարատ» ֆութպոլի ակումբի ձեր խաղընկերները, իսկապէս հերոսութիւն էր` հաշուի առնելով, թէ ինչպիսի մրցակցութեան պայմաններու մէջ կրցաք նուաճել Խորհրդային Միութեան ախոյեանի կոչումը եւ ԽՍՀՄ բաժակը»: Անոր խօսքով` այդ լուրջ պայքարին մէջ հայ ֆութպոլիստները յաղթող եղան` կարենալով մեր ժողովուրդին պարգեւել կրկնակի յաղթանակի բերկրանք ու հպարտութեան պահեր:

«Հաւատացէք, այսօր՝ 45 տարի անց ալ, մենք ո՛չ պակաս հպարտութիւն կ՝ապրինք: Դուք հայ ժողովուրդի համար առասպելական անձնաւորութիւններ էք»,- նշած է ՀՀ ԱԺ նախագահը:

ՀՀ ԱԺ նախագահի տեղակալ Էդուարդ Շարմազանովը նոյնպէս շնորհաւորած է արարատցիները` ընդգծելով, որ այս տարին յոբելինական է մեր ժողովուրդին համար. պէտք է նշուի Հայաստանի առաջին հանրապետութեան հռչակման 100-ամեայ յոբելեանը, արցախեան շարժման 30-ամեակը, ինչպէս նաեւ «Արարատ 73»-ի կրկնակի յաղթանակին 45-ամեակը: 20-րդ դարուն հայ ժողովուրդի ազգային զարթօնքի յաղթական էջերը վերհիշելով` Էդուարդ Շարմազանովը կարծիք յայտնած է, որ անոնց շարքին իրենց ուրոյն տեղը ունին նաեւ մարզական նուաճումները: «Դուք կաք ու պիտի մնաք ո՛չ միայն մեր մարզական աշխարհի, այլ նաեւ հասարակական կեանքի ամենավառ աստղերէն»,- փաստած է ՀՀ ԱԺ նախագահի տեղակալը:

  • Facebook
  • Twitter
  • Delicious
  • LinkedIn
  • StumbleUpon
  • Add to favorites
  • Email
  • RSS