Ֆրանսան Պէտք է Կանխէ ՀՀ Դիւանագիտական Անձնագրերով ԼՂ Ներկայացուցիչներուն Մուտքը. Հաճիեւ

78966

Ֆրանսան, իբրեւ ԵԱՀԿ Մինսկի խումբի համանախագահ, պէտք է ձեռնարկէ անհրաժեշտ քայլեր` «կանխելու Շէնկենեան վիզայի կանոններու խախտումով Հայաստանի դիւանագիտական անձնագրերով անօրինական վարչակարգի ներկայացուցիչներուն մուտքը երկրի տարածք»:

Այս մասին, ըստ Artsakhpress.am-ի՝ Trend-ին յայտնած է Ատրպէյճանի արտաքին գործոց նախարարութեան մամլոյ խօսնակ Հիքմեթ Հաճիեւը` մեկնաբանելով ֆրանսական շարք մը քաղաքներու մէջ Արցախի հետ կապուած ձեռնարկներու իրականացումը:

Հաճիեւը յիշեցուցած է, որ 2015 թուականի Յուլիս 2-ին ֆրանսական կառավարութիւնը երկրի ԱԳՆ-ի եւ ՆԳՆ-ի մակարդակով տեղի իշխանութիւններուն ուղարկուած էր շրջաբերական: «Այդ շրջաբերականով տեղական ինքնակառավարման կառոյցներուն եղած էր նախազգուշացում միջազգային համագործակցութեան ոլորտին մէջ լիազօրութիւններու սահմանափակման վերաբերեալ, եւ տեղական մարմիններուն արգիլուած էր, ի հակակշիռ կեդրոնական իշխանութիւններու քաղաքականութեան եւ Ֆրանսայի միջազգային պարտաւորութիւններու, ստորագրել միջազային համագործակցութեան փաստաթուղթեր ֆրանսական կառավարութեան կողմէ չճանչցուած վարչակարգերու, ինչպէս՝ ԼՂ անօրինական վարչակարգի հետ»,- ըսած է ան:

Ատրպէյճանի ԱԳՆ մամլոյ ծառայութեան ղեկավարը ընդգծած է, որ «անօրինական վարչակարգի հետ ֆրանսական այս կամ այն քաղաքի կամ բնակավայրի հետ կապերու հաստատումը ուրիշ բան չէ, քան ինքնախաբէութիւն»:

«Փորձը ցոյց կու տայ, որ նման քաղաքներու կամ բնակավայրերու ղեկավարները կը զբաղին նման ինքնագործունէութեամբ անոր համար, որպէսզի տեղական ընտրութիւններուն ստանան տեղի հայկական համայնքին աջակցութիւնը»,- ըսած է ան` աւելցնելով, որ «այդ նպատակով անոնք դուրս կու գան բարոյական չափանիշներու շրջանակներէն»:

  • Facebook
  • Twitter
  • Delicious
  • LinkedIn
  • StumbleUpon
  • Add to favorites
  • Email
  • RSS