Հայաստանցիներուն Մեծ Մասը Այս Ամանորին Նախընտրած են Հանգստանալ Արաբական Երկիրներու Մէջ

winter-cascade6c9ccc7b7f4e6ba58dafff0000d4a825

Արդէն քանի մը տարի է, որ հայաստանցիներէն շատերը Ամանորը կը նախընտրեն անցնել արաբական երկիրներու մէջ: Ըստ Armenpress.am-ի՝ զբօսաշրջական շարք մը գործակալութիւններ նշած են, որ հայաստանցիներուն ամենասիրած ուղղութիւնները, ինչպէս վերջին քանի մը տարիներուն, կը շարունակեն մնալ Տուպայն ու Եգիպտոսի հանգստավայրերը: «Նախ դէպի այդ երկիրներ կայ ուղիղ չուերթ, այնտեղ տաք է եւ համեմատաբար աւելի մատչելի»,- նշած են զբօսաշրջական ընկերութիւնները:

ԱՄԷ-ին եւ Եգիպտոսին կը յաջորդեն Թայլանտը, Իտալիան եւ Չեխիան:

Ամանորին արաբական երկիրներու մէջ հանգիստը մէկ անձի համար կը սկսի 650 տոլարէն մինչեւ 900 տոլար: «Գինը կախուած է հիւրանոցային պայմաններէն, թէ քանի անգամեայ սնունդ կը պարունակէ, եւ այլն»,- նշած են գործակալութիւնները:

Ամանորին Հայաստանէն ո՛չ միայն մեկնած են, այլեւ մեր երկրին մէջ նախընտրած են իրենց հանգիստը անցնել շարք մը երկիրներու քաղաքացիներ: Վիճակագրութիւնը նոյնն է, այս տարի՝ այցերուն քանակով կը գերակշռեն Ռուսայէն եկածները: Երկրորդ տեղը ֆիլիփինցիներն են:

Զբօսաշրջական գործակալութիւնները կը նշեն, որ Ռուսիոյ քաղաքացիները մայրաքաղաքի մէջ միջինը կը ծախսեն 23 հազար ռուբլի: Քաղաքէն դուրս հանգիստը աւելի սուղ է` կապուած փաթեթներու հետ: «Ռուսիայէն եղածները, մասնաւորապէս, կը նախընտրեն հանգիստը անցնել Ծաղկաձորի մէջ: Հայաստանը օտարերկրեայ զբօսաշրջիկները կը գրաւէ բնական-մաքուր սնունդով, բնութեամբ, մատչելիութեամբ: Ռուսիայէն եկածներուն համար, վիզայի ազատականացումը նոյնպէս աւելի դիւրացուցած է Հայաստան մուտք գործելը»,-նշած են ներգնայ զբօսաշրջութեան մասնագէտները:

Հայաստանի ներգնայ զբօսաշրջութեան միութեան տնօրէն Կարինէ Դաւոյեանի խօսքով` Հայաստանը զբօսաշրջիկներուն համար գրաւիչ է ո՛չ միայն Ամանորի օրերուն: «Անոնք այստեղ ո՛չ միայն Նոր Տարին կը նշեն, այլեւ աւանդաբար կ՝այցելեն թանգարաններ, մշակութային, պատմական տարբեր վայրեր: Այդ օրերուն զբօսաշրջութեան մէջ ուղղակի կ՝աւելնայ նաեւ ժամանցի գործօնը»,- ընդգծած է ան:

  • Facebook
  • Twitter
  • Delicious
  • LinkedIn
  • StumbleUpon
  • Add to favorites
  • Email
  • RSS